Sinittarfimmi heksehyleq: - Igalaat matunissaat eqqaamallugit

Nuka Larsen Nuummi Qapiarfiusaami inissiarsuit ilaanni najugaqarfimminut angerlarami natermi titarnerit qernertut maluginngilai.

Titarnerit seersartunit heksehylineersuupput. Taanna ilaquttanilu inigisaminnit anisimapput sinittarfimminni igalaaq ammatillugu.

- Siniffipput eqqorsimanngimmagu ikuallanngilaarsimavugut, Nuka Larsen oqarpoq.

Nuka Larsen Qapiarfiusaami inissiarsuit quleriaat ilaanni alliup tulliani uinilu meeqqatillu pingasut najugaqarput, inigisaallu aqqusinermiit qummut 10 meterisut portutigisumiippoq. Ilaqutariit igalaaq ammatillugu ilisarisimasaminnut decembarip 28-ani ualikkut kaffisoriartorput. Unnukkut angerlarput, sinittarfimmili natermi titarneq qernertoq maluginagu innarput

Ullaakkut makillutik natermi titarnerit qernertut heksehylerlu seertinneqarsimasoq aatsaat takulerpaat.

Assi © : KNR / Malik Brøns

- Iterlunga alersililerlunga aatsaat kinertoq malugivara. Tassani titarnerit qernertut aatsaat nassaariortorpakka. Suliartoreersungalu uima allaffigivaanga ilumut taamatut pisoqarsimasoq, Nuka Larsen oqaluttuarpoq, nangillunilu:

- Ilimaginngikkaluarparput taamatut pisoqarumaartoq.

Nuka Larsenip uiatalu sinittarfiat pinnguartarfiup qulaatungaaniippoq. Nuka Larsenillu ilimagivaa tassanngaanniit igalaanut qummut heksehylinik milorujussisoqarsimasinnaannera.

- Massakkut aalangerpugut angerlarsimatinnata igalaat tamaasa matoqqatittalerniarlutigit.

- Kingusiinnaa aamma itinerusumik aatsaat eqqarsaatigilerparput kingunerisinnaasimasai suusimasinnaangaluarnersut. Eqqarsaaterpassuupput, Nuka Larsen oqarpoq.

Ajorluinnartumik pisoqarsimasinnaangaluartoq

Nuka Larsenip kikkut taamaliorsimasinnaanersut nalugamiuk pisoq politiinut nalunaarutiginngilaa.

Qapiarfiusaamilu heksehylinik inissiap iluani seertitsisimaneq pillugu politiit nalunaarfigineqarsimanngillat. Politiinilu pingaartup inissiat iluani heksehylinik seertitsisarneq qanoq ulorianarsinnaatiginersoq oqaaseqarfigisinnaanngilaa, taarsiullugulu qatserisartunut innersuussilluni.

Nuummi upalungaarsimasuutitat pisortaata, Knud Petersenip, nalilerpaa heksehylit seerfigisaasa eqqaanni ikuallajasoqarsimagaluarpat taakkua ikuallatsitsilersimasinnaasimassangaluartut.

Assi © : KNR / Malik Brøns

- Navianartorujussuusinnaavoq. Ajuissunik kinguneqarsinnaavoq. Taamaaliortullu mianersoqqussummik assorsuaq tunerusunnaraluarput pisoq ajortorujussuarmik kinguneqarsinnaammat, upalungaarsimasut pisortaat taama oqarpoq.