30-nik ukiulik pinngitsaaliisutut pasineqartoq
Angut 30-nik ukiulik niviarsiaqqamik ukiukitsumik pinngitssaliisimasutut politiinut marsip sisamaani unnuakkut pingasunngulersoq nalunaarutigineqarpoq. Niviarsiaraq oqaloqatigineqareertorlu unnuami sisamanngulersoq angut politiinit tigusarineqarpoq. Angut inatsit tunngviusoq naapertorlugu ulloq taanna killisiorneqarpoq, ullunilu 25-ini tigummigallagassanngortinneqarluni, paasiniaanermut sunniuteqannginnissaa anguniarlugu.
Politiillu misissuinerisa takutippaat angut 30-nik ukiulik aamma allamik niviarsiaqqamik qulinik ukiulimmik pinngitsaaliisimasinnaasoq.
Politiinut saaffiginninnerit 259-it februaarip 27-anit marsip arfineq-pingajuannut pisimapput. Taakkunanilu 76-it inatsisinik unioqqutitsisutut politiinit suliassanngortinneqarput. Taakkunani 17-it politiit tigusarisariaqarsimavaat isertitsisarfimmullu inissikkallartariaqarlugit, aalakoorpallaarneri imaluunniit politiit paasiniaaneranni sunniuteqannginnissaat anguniarlugit, taama Carl Sværd Nuummi vicepolitikommissæriusoq tusagassiutinut nalunaarummi allappoq.
Politiit Nuup illoqarfiata qeqqani ikiaroornartunik aamma piffissami pineqartumi tuniniaasut orniguffigisarsimavaat. Aanngajaniutinut inatsisimmik unioqqutitsisimasutut 20-it politiinit suliassanngortinneqarput, tassani ikiaroornartunik tuniniaasut pisisullu pissutissalimmik politiinit pasineqarput.
Tusagassiutinut nalunaarummi Nuummi politiit inuit angallaffigisartagaanni nioqqutissanik akikitsunik pisinissamut mianersoqqusipput. Piffissami pineqartumi 23-it tilliffigitissimasut politiinut nalunaarsimapput. Inuit, pisiniarfiit angerlarsimaffiillu tillinniarfigineqarsimallutik.
Nioqqutissanik akikitsunik allagartamik uppernarsaateqanngitsunik naammattuuisoqassagaluarpat, tamanna politiinut nalunaarutigeqquneqarpoq, 32 14 48-mut.
