28-nik ukiullip Nashvillemi aallaasersortup sakkuni inatsisit atuuttut naapertorlugit pisiarisimagai
USA-mi illoqarfiit ilaanni Nashvillemi atuarfiit ilaanni ippassaani ataasinngornermi aallaasersortup saassussinnginnermini sakkut assigiinngitsut arfineq-marluk inatsisit atuuttut naapertorlugit pisiarivai.
Politiit tusagassiortunut ippassaq marlunngornermi ualisoq sassarnerminni taama ilisimatitsipput.
Sakkut arfineq-marluk akornanni pingasut saassussinermi atorneqartut ilaatigut oqaatigineqarpoq.
28-nik ukiullip, Audrey Halep, meeqqat pingasut qulingiluanik ukiullit inersimasullu pingasut kristumiut atuarfiisa ilaanni aallaallugit toquppai.
Illoqarfik Nashville USA-mi naalagaaffimmi Tennesseemiippoq.
Hale atuarfimmi pineqartumi siornatigut atuartuusimasoq, politiit siusinnerusukkut ilisimatitsissutigaat.
Saassussinermut suut pissutaanersut politiinit suli ilisimaneqanngitsoq, tusagassiortunut ippassaq marlunngornermi sassarnermi oqaatigineqarpoq.
Inuit ataasiakkaat pinnagit atuarfiup saassunneqarnissaa ilimanartoq, takussutissat takutikkaat politiit oqaatigaat.
- Kristumiut atuarfiat saassussinermi eqqorniarneqarpoq, politiit paasissutissiisartuat Don Aaron oqartoq tuluit nutaarsiassaqartitsiviat BBC allappoq.
Saassussisoq 28-nik ukiulik politiinit siornatigut alaatsinaanneqarsimanngilaq.
USA-mi sakkoqarsinnaanermut inatsit, soorlu atuarfinnik saassussinernut saassussinernulluunniit allanut atatillugu, oqallisigineqakkajuppoq.
Inatsilli tamatigungajak allanngortinneqarneq ajorpoq, amerikamiummi amerlasuut isumaqaramik sakkoqarsinnaatitaallutik.
