USA-mi senatorit sakkoqarsinnaanermut inatsisinik sukaterinissamut isumaqatigiittut
USA-mi sakkoqarsinnaanermut inatsisinik sukaterinissaq USA-mi senatorit qulit demokraatineersut allallu qulit republikaanerineersut isumaqatigiissutigaat.
USA-mi sakkoqarnissamut inatsisinik sukaterinissamik siunnersuuteqarneq sakkuuteqarsinnaanermut pisinnaatitaaffimmik inatsisitigut sinaakkusiisuussaaq.
Sakkuuteqarsinnaanermut sukaterinermi ilaatigut sakkunik, aallaasinik assigisaannillu pisiniarnermi 21-nik ukioqalereersimanissaq qulakkeerneqartalissaaq kiisalu sakkusiniartut paasissutissaataat misissorneqartalissallutik.
Tamatuma saniatigut USA-mi naalagaaffiit ataasiakkaat namminneerlutik sakkunik atuinermut inatsisiliorsinnaatitaanissaat tapersersorneqarpoq, assersuutigalugu inuk aallaasitaarniartoq inoqatiminut imminullu ulorianartorsiortitsisinnaasutut nalilerneqarpat, taava pisitinngitsoortinneqarsinnaalissaaq.
Sakkoqarnissamik inatsisinik sukaterinikkut meeqqat atuarfiini sillimaniarneq tarnikkullu peqqinnerulernissaq anguniarlugit suliniutit pitsaanerulersinniarneqarput.
- Alloriarneruvoq pingaarutilerujussuaq, USA-p præsidentia Joe Biden oqarpoq.
AAMMA ATUARUK USA pillugu ilisimasaqarluartoq: Sakkut pillugit inatsisip allanngortinnissaa Bidenimut ajornakusuussaaq
Taassumali tikkuarpaa sakkoqarsinnaaneq pillugu inatsisinik sukaterinissamik isumaqatigiissuteqarneq naammanngitsoq, ilorraalli tungaanut alloriarnerusoq.
USA-mi kongressit sakkoqarsinnaanermut apeqqut ukiorpassuanngortuni avissaartuussutigaat, tamatumunngalu USA-p tunngaviusumik inatsisaani Amerikamiut sakkoqarsinnaanermut pisinnaatitaaffeqarnerata naqissusigaanera peqqutaavoq.
USA-mi inuppassuit inuunerannik naleqartunik aallaasersoqattaartoqarneratigut, sakkoqarsinnaatitaaneq piffissami kingullermi oqallisigineqartorujusuuvoq.
Texas-imi illoqarfimmi Uvalde-mi maajip 24-anni aallasersortoqarmat meeqqat 19-it ilinniartitsisullu marluk toqutaapput.
Ullut qulit qaangiutiinnartut New Yorkimi ammip qalipaataanik assigiinngitsineq tunngavigalugu aallaasersortoqarmat inuit qulit toqutaapput.
USA-mi politikkikkut iliuuseqartoqarnissaa kissaatigalugu illoqarfinni arlalissuarni ippassaq arfininngornermi inuppassuit akerliussutsimik takutitsipput.
