26-nik ukiullip toqutsisutut eqqartuunneqartup illersuisua: Qaqugu Danmarkimut nassiunneqartarunnaassappat

Arnaq 26-nik ukiulik siorna februaarimi toqusisimanini pissutigalugu tarnikkut napparsimasunut inissiisarfimmiittussanngortinneqarluni ullumi siusinnerusukkut eqqartuunneqarpoq.

Arnaq inunnguutsiminik qaratsamigut innarluuteqarnini nunatsinnilu allatut periarfissaqannginnera pissutigalugu Danmarkimi inissinneqartussanngortinneqarpoq.

Tamannalu ajornartorsiutaasoq, illersuisua, Christina Johnsen isumaqarpoq.

- Danmarkimut inissiinermik eqqartuussineq anisitaanermik eqqartuussinermut assinguvoq, pissutigalugu nammineq innuttaasugut sungiusimasaanit allartittarpagut, taanna oqarpoq.

Taassuma suliami matumani 26-nik ukiulik inunnguutsiminik innarluuteqarnini pissutigalugu inissinneqarnissamik eqqartuunneqarpoq, tamanna arnap inunnguutsimik innarluuteqanngikkaluaruni eqqartuussutissaanit sakkortuneruvoq.

- Arnaq eqqarsartaatsimigut unammillernartitaqanngikkaluaruni’ nalinginnaasumik pineqaatissinneqarsimasunut inissiisarfimmiittussanngortinneqassagaluarpoq.

- Innuttaasut ilaat sanngeereersut nunatsinnit aallartinneratigut suli sanngiinnerulersittarigut aarleraara, taanna oqarpoq.

Siullermiilinngitsoq

26-nik ukiulimmut tunngatillugu suliamitulli nunatsinni allamik periarfissaqannginnera pissutigalugu Danmarkimut aallartitsisoqartariaqarnerani siulliunngilaq.

Taamaammat illersuisoq apeqqusiisumik aperivoq:

Nunarput inuit Danmarkimut aallartinneqartarunnaarnissaanut sinaakkutinik pilersitsiniarluni qanoq iliorpa? Apeqqut tamanna Nunatta Eqqartuussisuuneqarfianut apeqqutiginiarlugu aamma eqqarsaatigaa.

Taassumami ullumi aalajangiineq Nunatta Eqqartuussisuuneqarfianut ingerlateqqinniarlugu aalajangerpaa.

- Pineqaatissiissut suliassanngorteqqinniarparput. Toqutsinermi pisuunersoq aalajangiiffigisariaqanngilaq. Taamaallaat Danmarkimut inissinneqartussanngortinneqarnera eqqortuunersoq nalilissavarput, taanna oqarpoq.

Suliamik misiliuteqartoqarnissaanut piffissanngortoq

Arnaq 26-nik ukiulik pillugu suliaq pissut ajornaatsunnguaq pissutigalugu Nunatta Eqqartuussisuuneqarfianit suliarineqassasoq, Christina Johnsen isumaqarpoq:

- Katitikkatut iinnarpoq, inunnik Danmarkimut aallartitsiinnartarpugut. Suliat ingerlateqqinneqarnikuunngillat, kisianni uanga taamaaliornissannut piareersimavunga, taanna oqarpoq.

Christina Johnsen nunatsinni akisussaaffimmik ilungersuussinerugutta innuttaasunut 26-nik ukiulittut ittumut inissiiffissaqassagaluartugut isumaqarpoq, taamaammat aqqut tamaat sulissuteqarnissaminut piareersimavoq.