21 millioninik sippuineq: Kommune Qeqertalik isornartorsiorneqartoq
Naqqiut: Borgmesterip Ane Hansenip, sippuineq kommunalbestyrelsemut junimi nalunaarutigisimagaa allaaserisami siullermik allasimagaluarpoq. Tamanna eqqunngilaq. Aggustimi ilisimatitsivoq. Kukkunerput ajuusaarutigaarput.
Naqqiuk 2: Kommunalbestyrelsip aggustip 31-ani ataatsmiinneranit imaqrniliami erseppoq, missingersuutinilk sippuineq pillugu kommunip politikerii ilisimatinneqartut. Taamaammat Roger Buch pasissutissat eqqunngitsut, KNR-ip isornartussarsioqqaannagit tassunga saaqqummiussaannik, tunngavigalugit oqaaseqarpoq. Allaaserisap tunngavia taamaammat eqqunngilaq. Kukkunerput ajuusaarutigaarput.
Kommune Qeqertalimmi Kangaatsiami Aasiannilu inunnik isumaginninnermik suliaqarfik, Inuit, missingersuutiminik 21 millionit koruuninik sippuivoq.
Tamanna kommunip illoqarfinni pisortaasa aamma immikkoortortaqarfiup Aningaasaqarneq aamma Isumalluutinik taaguutillip natsorsuutinik piffissakkaartumik misissuinerminni paasivaat.
Kommunalbestyrelseli tamakkiisoq tamatuminnga oktoberip 27-ani aatsaat ilisimatinneqarpoq. Kommunimi qinikkat tamanna sioqqullugu marloriarlutik ataatsimiipput, siullermik augustip 31-ani aamma septembarip 29-ani.
5-6 procenti
Borgmesterip Ane Hansenip Inuit Ataqatigiinneersup, kommunillu pisortaanerata sippuineq kommunimi qinikkanut ingerlaannartumik ilisimatitsissutigisussaagaluaraat, kommunit ingerlatsinerannut tunngasunik ilisimatusartoq naliliivoq.
- Borgmesterip kommunimilu pisortaanerup kommunimut qinikkat naammattumik paasitinneqartarnissaat akisussaaffigaat, Roger Buch KNR-mut oqarpoq.
Qeqertalimmi partiit annersaanni IA-meersut Frantz Lundblad Karl Thue Nathanielsenilu kommunimi qinigaapput, aningaasaqarnermullu ataatsimiititaliamut ilaasortaallutik. Taakkua 21 millionit koruuninik sippuineq piffissami sivisuumi ilisimasimanagu oqarput, taakkualu naammagisimaarinninngillat. Tamanna ilisimatusartup paasisinnaavaa.
- Uani millionilikkaat, missingersuutit 5-6 procentiat oqaluuseraarput. Taakkua aningaasarpassuupput, taamalu sippuisimanermik paasitinneqarsimanani iluarinninnginneq paasinarpoq, Roger Buch oqarpoq.
Ingerlatsiviup Inuit ukioq mannamut missingersuutai 356 millionit koruuniupput.
AAMMA ATUARUK Kommune Qeqertalimmi qinikkat IA-mit Siumumut ilaasortanngortut
Frantz Lundblad, borgmesterimut siullertut tullersortaasoq, aamma Karl Thue Nathanielsen, aningaasanik atuivallaarsimaneq ilisimaneqalermat, illua tungiliuttuusunut Siumumut ilaasortanngorput.
Ilisimatusartup oqarnera naapertorlugu, kommunimi qinikkani borgmesteri kisimi kommunip konto-inik misissuisinnaavoq.
Taamaattumik borgmesterip, aningaasarnermut ataatsimiititaliami aamma siulittaasuusup, kommunimi qinikkat aningaasaqarneq pillugu paasitittartussaavai.
- Kommunimut qinikkat missingersuutit sipporneqarnerannik aningaasartuutillu naatsorsuutigisamit amerlanerunissaannik paasitillugit, Roger Buch.
Borgmesteri: Junimili paasivaat
Borgmesterip, Ane Hansenip, qinikkat aningaasanik atuivallaartoqarsimasinnaaneranik kommunalbestyrelse aggutsimi ilisimatissimallugu oqarpoq. Sippuinerli misissoqqissaarneqareermat tigussaasumillu akissutissarsigamik oktobarimi aatsaat sorpiaaneranik ilisimatitsivoq.
- Ilimagisaminngaanniit soorlu utoqqaat innarluuteqalersimasut amerlanerususimapput. Aamma meeqqanut immikkut pisariaqartitsisunut aningaasartuutigut annertunerusimapput, Ane Hansen oqarpoq.