2022-mi ukiukkut OL-erfissaq aqagu toqqarneqassaaq

Tallimanngorpammi 2022-mi ukiukkut sumi OL-ertoqassanersoq aalajangerneqassaaq.

OL-imut ataatsimiititaliami ilaasortat Kuala Lumpurimi, Malaysiamiittumi, naapippata sumilu ukiut arfineq marluk qaangiuppata ukiukkut OL-ertoqarnissaa toqqalerunikku, Beijingip toqqagaanissaa ilimanarnerpaavoq.

Kisiannili Almaty, tassa Kasakhstanip illoqarfiisa annersaat, aamma toqqagassanut ilaarusuppoq, illoqarfiup toqqagaanissaanut suliniartut siulittaasuata qularinngilluinnarpaa illoqarfitsik Kinamit ukiukkut OL-erfigissallugu piukkunnarnerusoq.

Beijingimimi ukiukkut OL-ernermi unammiffissat tamarmik sanaartorneqaqqaassaapput.

- Uagut ukiukkut timersortarfeqareerpugut, taakkulu unammersuaarfiginissat takorloorparput. Illoqarfipput ilumoortumik ukiuusarpoq, ukiukkullu timersorfiusarluni, pinngortitaq pinngortitaviuvoq, qaqqat qaqqaviupput aputerpullu aputiviusarluni, illoqarfup toqqagaanissaanut suliniartut, Almaty 2022-mik taasut, siulittaasuata tullerisaa illoqarfiullu borgmesteria, Andrey Kryukov, oqarpoq.

Taama oqarnera Beijingimi nuannarineqarunanngilaq, Kinamimi 2022-mi ukiukkut OL-ertoqassappat annertuumik aputaasaliortariaqassagamik Beijingimilu 2008-mi aasakkut OL-ertoqarnerani unammiffiusimasut allanngortitertariaqassagamikkit.

OL-ertoqarnissaali sumiissagaluarpalluunniit kalaallinik 2022-mi OL-imut unammeqataasoqarnissaa neriuutigineqarsinnaavoq, immaqalu erfalasorput ilisarnaatigisinnaassallutigu?

Kuala Lumpurimi tallimanngorpat, aqagu, toqqaassapput.