2015-imut akuersissutit 2016-imi aamma atuutissapput
Tassa umiatsianik 6 meterinit minnerusunik aalisariutillit qaleralinniarsinnaanermut, saarullinniarsinnaanermut assagiarsunniarsinnaanermullu ukioq mannamut akuersissutillit akuersissutitik aappaagu 2016-imi aamma atorsinnaassavaat. Aalisarnermut, Piniarnermut Nunalerinermullu Naalakkersuisoq Karl-Kristian Kruse taama nalunaaruteqarpoq.
- Taamaasilluni umiatsiaararsorlutik 2015-imi qaleralinniarsinnaanermut, saarullinniarsinnaanermut assagiarsunniarsinnaanermulluunniit akuersissuteqartut 2016-imut akuersissuteqarnissaminnut qinnuteqartariaqassanngillat. Aalisarnermut Naalakkersuisoq oqarpoq, erseqqissaallunilu umiatsiaararsorluni aalisarsinnaanermut 2015-imi akuersissutit aamma 2016-imi atuutissasut, akuersissut aalisarnermut pisanillu tunisinermut uppernarsaataassalluni.
Umiatsiaararsorluni aalisarsinnaanermut akuersissutip ukiumi ataatsimi atuuttarnera nalinginnaasuuvoq.
Aalisarsinnaanermut akuersissutit pillugit nalunaarummi paragraf 3, stk.4-mi aalajangersagaqarpoq akuersissutit sivisunerpaamik ukiuni marlunni atuussinnaasartut, Naalakkersuisullu aalisarsinnaanermut akuersissutit pillugit nalunaarummi periarfissaq taanna maanna tassa atuutsinniarpaat.
