200-ut Københavnimi isummaminnik nittarsaapput
Oqariartaatsit soorlu: Qanga kingullermik nersussuarmik pilluartumik takuit? Sooq pinngortitat naaggaarlugu? Aamma: Atuutsinneqarsinnaasumik Inuit immikkut akuerineqarnissaat pisariaqartipparput. Taama ilaatigu oqariartuuteqarput inuit 200-ut missaanniittut Københavnip aqquserngisigut ingerlaarlutik isummaminnik nittarsaasut Fælledparkenimi sulisartut ulluannik malunnartitsiniaasut akuuffigiartuutaa.
Isummanik nittarsaassinnermut aaqqissuisut KNAPK-meersut nalunaarutigaat taamatut ingerlaaqatigiinnermi anguniarneqartoq kalaallit piniartut atugaannik qallunaat paasinninnerulernissaat.
- Neriuutigaarput tamatuma kingorna kalaallit puisit amiinik tunisassiaat tuniniarneqarsinnaaleqqissasut, Leif Fontaine oqarpoq.
Ammerivik Great Greenland Namminersorlutik Oqartussanit pigineqartoq kaaviaartitamigut ukiut kingulliit kinguariarujussuarpoq. Ingerlalluarnerpaagami 70 millioner koruunit kaaviiaartissimagaluarlugit ullumikkut 10 millioner koruunit ataalllugit kaaviiaartippai.
Taama pisoqarneranut puisit amiisa eqquteqqujunnaarnissaannik EUp 2007-mi aalajangernera KNAPKp pissutaatippaa, taanna pissutigalugu puist amiinik tunisassiat tunineqarsinnaajunnaapajaarmata.
Amigartooruteqarneq pissutigalugu Namminersorlutik Oqartussat arlaleriarlut aningaasaliisariaqartarsimapput.
Piniartut 1.500-ut missaanniittut ukiumut puisit amii 55.000-it tunisarpaat. Pisortat ammip tunineranut tapiissutigisarpaat 310 kroner (kisitsit 2010-meersuuvoq). Taamatulli tapiisoqartaraluartoq kinguariarneq piniartut malugaat.
- Puisit amiinik eqqusseqqusiunnaarneq pissutigalugu tunitsiviit arlallit matuneqarsimapput aammalu tunisinermut tapiissutit affaannanngortinneqarsimallutik. Aamma ukiut ingerlaneranni puisit amii tunineqartartut affaannanngorsimapput, Leif Fontaine oqarpoq.
