2 millionit koruunit KNR-ip immiussatoqqanik nutarsaaneranut iluaqutaassasut
A.P Møllerip Aningaasaateqarfia KNR-imut 2 millionit koruuninik tunissuteqarpoq. Aningaasat radiokkut tv-kkullu aallakaatitat pisoqqat digitaliseerernissaannut atorneqassapput.
Assersuutigalugu radiobåndi 1958-imeersuusinnaavoq, TV-båndilu 1982-imeersuusinnaalluni, imaluunniit båndit pisoqqat oqaluttuarisaanermut pingaaruteqarluinnartuusinnaapput.
KNR aamma A.P Møllerip Aningaasaateqarfia tusagassiuutinut nalunaarummi allapput.
- Båndit digitalisererneqareerpata taava aallakaatitassiat pissanganartut amerlasuut tamanut ammaanneqassapput, ilaqutariit ileqquinut tunngassuteqartut, piniariartarfinnut, kalaallisuuliornernut aamma umimmaat qiviunik suliarinninnernik politikkikkut inuunermut, Kalaallit oqaasiisa ineriartornerannut aamma silaannaap pissusaata allanngoriartorneranut nunat ilaanut issittumi pingaarutilerujussuit, tusagassiuutinut nalunaarummi allassimavoq.
Illuatungeriit oqarnerat naapertorlugu aningaasat immiussatoqqanik digitaliseeriinermik suliaqartussanik atorfinitsitsinermut atorneqassapput. Sumi tassani inuit marluk maanna sulisorineqarput.
KNR-ip inuit tallimat allat immiussatoqqanik digitaliseeriinermut atorfinitsissallugit naatsorsuutigaa. Inuit marluk radiokkut immiussanik tusarnaassapput pingasullu tv-kkut aallakaatitanik isiginnaassallutik.
- KNR-ip maannakkumut båndit amerlasuut digitaliserereerpai kisianni TV-båndit 9.000-it aamma radiobåndit 5.000-it suli digitaliserernikuunngillat. Immikkut ittumik aningaasaliinikkut taava KNR-ip naatsorsuutigaa digitaliseeriineq 2024-ip naanerani naammassineqassasoq, KNR allappoq.
Immiussatoqqanut toqqorsivik nutaaq suleqatigiissutigineqartoq
Tusagassiorfik suliamik sukkatsisitsiniarluni aningaasaateqarfimmut ukioq manna siusinnerusukkut qinnuteqarpoq.
- Immiussat erlinnartut pisoqalivallaartinnagit suliniutip naammassinissaa neriuutigaarput, KNR-ip pisortaa, Karl-Henrik Simonsen oqarpoq.
Radio aamma TV-båndimmi ilaat pitsaavallaarunnaarsimapput. Immiussatoqqat ”magnetbåndinut pitsaasunik toqqorsiveqannginneq oqullu pissutigalugu ajortikkiartuinnartut” KNR-ip ilanngullugu oqaatigaa.
- Taamaattumik kulturikkut kingornussat piffissami ungasinngitsumi kiisami qulakkeernissaannut periarfissaqarneq, KNR-ip nuannaarutigaa.
KNR-ip digitaliseeriinermik suliniuteqarneq naammassippat immiussatoqqat internet atorlugu isiginnaarneqarlutillu tusarnaarneqarsinnaalernissaat naatsorsuutigaa.
- Tamanna Nunatta Katersugaasiviata, Groenlandicap aamma Nunatta Atuagaateqarfiata suleqatigineratigut ingerlanneqarpoq, tassani atortuuterpassuagut ataatsimut katersornissaat eqqarsaatigaarput, Karl-Henrik Simonsen oqarpoq.
Naak immiussarpassuit pineqaraluartut suliniutip 2024-p naanerani naammassineqarnissaa pisortap naatsorsuutigaa.
- Suliaq arritsumik suliassaavoq, inummullu ataatsimut akunnerpassuit atorneqartariaqarlutik, taamaakkaluartorli naatsorsorlugu piviusorsiortumik nalilerparput.
