17,6 millionit koruunit Qaanaami ilisimatusarnermut aningaasaliissutigineqartut
Aningaasaateqarfik ataqqisaasoq National Science Foundation Qaanaami suliniummut ukiuni sisamani ingerlanneqartussamut 17,6 millionit koruunit nalingannik aningaasaliivoq.
Tapersiinermi Qaanaami piujuartitsisumik nukissiutaasinnaasumik ilisimatusarluni pilersitsinissaq ilaavoq.
Ilisimatusartoq, silallu pissusianik Pinngortitaleriffimmi ilisimatusarnermi aqutsisoq Lene Kielsen Holm, National Science Foundationimit Darthmouthimit ilisimatusartunik suleqateqartarsimasoq allappoq.
Darthmouthimit ilisimatusartut Pinngortitaleriffiullu Qaanaami innuttaasut nukissiuutinut piujuarnerusunut siunissami ikaarsaariarnerat malinnaaffigissavaat.
Qaanaamimi innuttaasunut nunatta sinneranut sanilliullugu silap pissusiata allanngoriartornerata sunniutaanik eqqugaanerungaatsiartut takuneqarsinnaavoq. Qaanaamimi innuttaasut piniarnermik inuuniuteqarput immallu sikuata allanngoriartorneranik sunnerneqarlutik.
Tamatuma saniatigut Qaanaami dieselimik orsussanillu allanik atuineq annikillerusunneqarluni.
Ilisimatuut suleqatigiinneranni nukissiutit piujuartitsinerusut atorneqarsinnaanngornissaat anguniarlugu teknikkikkut aaqqissuussisoqassaaq, aaqqiissutaasullu nunarsuarmi allami atorluarneqarsinnaanissaat siunertarineqarpoq.
National Science Foundationip millionilikkaanik Qaanaami ingerlatassamut tapiinera ”Isumassarsiat qulit” ilaattut aningaasaliiffigineqarpoq. Tassanilu Issittumi uumassusilerinermi, fysikkimi, kemiimi inuiaqatigiinnilu allanngoriartornerit silap pissusianut, silamut uumasoqatigiiaanullu nunarsuarmi tamarmi allannguinissaat toqqammavigineqassalluni tamannalu nunarsuup aningaasaqarneranut isumannaatsuuneranullu sunniuteqangaatsiassaaq.
