17-inik ukiullit biilernermut allagartartaartarnissaat Demokraatit ornigigaat
Danskit nalunaarutaat 17-nik ukiullit biilernermut aallagartartaarsinnaanerannut tunngasoq ukioq manna januaarip aallaqqaataani ukiuni pingasuni misiligutitut atulerpoq. Nalunaarusiap 17-inik ukiullit 18-iliinissap tungaanut 30-leereersimasumik ukiunilu qulini kørekorteqareersimasumik biileqateqarlutik biilertarnissaannik periarfissiivoq.
Naalakkersuisut nalunaarusiamut tassunga ilanngukkusunnersut §37 naapertorlugu apeqquteqarnikkut Randi Vestergaard Evaldsen Demokraatineersoq paasiniaavoq.
Inuusuttut 17-inik ukiullit biileqateqarlutik biilertarnikkut sungiusarlutillu siunnersorneqartarnissaat Demokraatineersup isumassarsiatsialaasoraa. Taamaaliornikkut angallannermi isumannaallisaaneq pitsaanerusoq aamma anguneqarsinnaasorigamiuk.
- Biilernermut allagartartaarnermii piffissaq siulleq sungiussiniarnermut aqqusinernilu pissutsinut ilinniarfiusarpoq, Randi Evaldsen KNR-imut oqarpoq.
- Misilittagalimmik ingiaqateqarnikkut (biileqateqarnikkut, aaqq.) aqqusinerni pissutsit atugassarititaasullu pillugit inuusuttut siunnersorneqarluarsinnaapput apeqquterpassuarnillu akissutisillutik. Taamaaliornikkut angallanneq aamma isumannaannerulersinnaasoraara, nangilluni oqarpoq.
Naalakkersuisut akissutissaat Randi Vestergaard Evaldsenip pissangagaa. Naalakkersuisullu danskit nalunaarutaannut ilanngunnissamik soqutiginninngippata Inatsisartut ukiaru ataatsimiinnissaannut siunnersuusiornissani naatsorsuutigalugu.
