13-inik ukiulik Blok P-mi ikuallatsitsisoq

Nuummi Blok P-mi ikuallattoqarneranik arfininngormat ualikkut kalerriisoqarpoq.

Qatserisartut takkummata paasineqarpoq, opgangimi quleriit qullerpaartaanniittumi papkarsit eqqagassallu ikuallanneqarsimasut.

Takunnissimasut oqaluttuarput, nukappiaqqat Blok P-mi qulleriit qullerpaartaanni pinnguartut takusimagitik, taakkulu ilaat 13-inik ukiulik papkarsinik ikuallatsitsisimasoq paasineqarpoq.

Nukappiaraq kinaassusersineqareerpoq, pisumullu atatillugu apersorneqareerluni.

Nukappiaqqap 15-it inorlugit ukioqarnera pillugu suliaq inunnik isumaginnittoqarfimmut ingerlateqqinneqassaaq.

Blok P-mi ikuallattoqarnerani inunnik aamma inissianik ajoqusertoqanngilaq, opganngili paatersimaqaluni.

Politiit angajoqqaanut inassuteqarput meeqqatik innermik pinnguassanngitsut oqaaqqissaassagaat, innermi ikuallatsitsilersinnaavoq, piaartumik qaminneqanngikkuni inuup inuuneranik navianartortitsisinnaasumik, taama Nuummi politiit ilisimatitsipput.