Oqaluuserisassat 111-t
![](/sites/default/files/styles/image_934x467/public/article_images/2014.12.11_-_15239.jpg?itok=5qICrdA5)
Inatsisartuni ilaasortat ukiakkut ataatsimiilerunik oqaluuserisassaat 111-upput. Taakkunannga ilaasortanit 69-it aamma Naalakkersuisunit 42-t oqaluuserisassanngortitaapput. Inatsisartut siulittaasuata Lars-Emil Johansenip tamanna ilisimatitsissutigaa.
Taassuma ilanngullugu oqaatigaa, oqaluuserisassat ataatsimiittarnerni kingullernitulli amerlassuseqartut, erseqqissarlugulu oqaluuserisassat naammassineqarnissaat siunnerfigalugu siulittaasoqarfik ulapinnerulaartariaqassasoq.
Oqallittoqarluartarnissaa qularutissaanngilaq. Minnerunngitsumik ataatsimiinneq aallartisimatsiaannalersoq siunissami mittarfeqarfinnik aaqqissuussinissami oqaluuserisassat siulliit aalajangiiffigineqartussaapput.
Aamma atuaruk Partiit inatsisissatut siunnersuutinik 71-inik nassiussaqartut
Ukiakkut ataatsimiinneq tallimanngornermi septembarip 25-anni aallartissaaq, ukiaaneranilu ataatsimiinnerup naammassinissaanut, tassa decembarip aappaata tungaanut ataatsimiittoqassalluni.
Ulluinnarni aqutsinermi malittarisassat nutaat atuutileqqammerput, tamatumalu kinguneranik Inatsisartuni ilaasortat apeqquteqaat tunngavigalugu oqaluuserisassanik ataavartumik oqaluuserisassanngortitsisinnaallutik. Tamatuma saniatigut apeqquteqaat tunngavigalugu oqallinnerit kingorna Inatsisartunit oqaaseqaasiortoqartassalluni.
Ataatsimiinnerni siuliinisulli siunnersuutit ilaat piumasaqaatinik naammassinniffiusimanngitsut siulittaasoqarfiup itigartittariaqarsimavai, Lars-Emil Johansenilli erseqqissarpaa, siunnersuutinik eqqortunik nassitseqqinnissamut periarfissaqarmat, taakkulu aappaagu upernaakkut ataatsimiinnermi oqaluuserineqarsinnaassammata.