11 kilometerinik portussusilimmi katittut
Lavra Lumholt Ilulissani meeraasimasoq ataasinngornermi timmisartorsuarmut Norsamut ilaatilluni meeqqanilu aquttarfimmut aggeqquneqarpoq. Tassani qaqutigoortumik tupaallatsinneqarpoq uitaava Rene Holm aperimmat maanna katikkusunnersoq.
Nuliarsartumut angerpoq timmisartullu naalagaa Arne Pallesen katititsivoq nuannerluinnartumik allorniusami avannamukartumi 67-mi kippasissutsimilu 44-mi nal. 12.10 – qallunaat nunaanni nal. 16.10-nngortoq, Air Greenland taama nalunaarpoq.
Taama pisoqarnissaa Rene Holmip ukiuni qulini utaqqissimavaa. Taamami sivisutigisumik inooqatigiissimapput ataatsimut meeraralugit Julius arfinilinnik ukiulik aamma Elias pingasunik ukiulik.
Tassalu taakku nukappiaqqat angajoqqaatik silaannarmi katittut isiginnaarpaat.
- Lavra qallunaajuvoq uangalu kalaaliullunga, taamaammallu eqqarsarpunga nunatta Danmarkillu akornanni, tassa nunat taakku akornanniilluta katissinnaagutta nuannissagaluartoq, uisaaq Rene Holm tulluusimmarluni oqaluttuarpoq.
Katittoqarnera erngerlugu timmisartup højtaleriisigut nalunaarutigineqarpoq ilaasullu kaffimut ullumikkut kransekage-sortinneqarput katernaat champagne-mik skål-eertut.
Ulloq katiffiat Københavnimi naavoq ilimanarporlu tikimmata pilluaqqusiniartunik utaqqisoqarsimassasoq.
