KNR ”Tallimanngorneq Unnuppaat Man”
Nunatsinni kikkunnut tamanut saaffiginnittumik aliikkutassiamik aallakaatitsisarnissaq anguniarneqarpoq – minnerunngitsumik ilaqutariinnut tamanut sapaatit akunnerani sivisuumi sulereersimallutik, atuareersimallutik allanillu susassaqareersimallutik eqqissisimaarusuttunut, taamatut oqarpoq KNRp pisortaa Søren Lennert Mortensen.
Aallakaatitassiami nutaami sammiuagassaq tassaavoq inuit namminneq videoliaat – isiginnaartut namminneq videoliorlutik aammattaaq internettimit takutitassiamerngit. Isiginnaartut periarfissinneqassapput namminneq imminni videoliaminnik quianartunik, nuannersunik aamma aliikkusersuinermik takutitsisunik nassitsisarnissaminnut, taakku SMS-erluni taasisitsinikkut sapaatit akunnerani videoliallammattut toqqarneqarsinnaasassallutik. Sapaatit akunnerani videoliallammak inaarutaasumik aallakaatitsinissamut ingerlaqqissapput, tassani isiginnaartut ukioq manna nammineq videoliallammattut 2014 taasitinneqassallutik. Ajugaatinneqartoq angalanissamut tunissuteqarfigineqassaaq DKK 25.000-inik aningaasartalimmik.
Immikkut eqqugassatut sms-erlutik taasinerni tamani pissarsiarineqarsimasut akornanni makitsisoqassaaq, tassani eqqugassaalluni smart-tv pitsassuaq.
- Tamanna allaanerusutut aliikkusersuilluni aallakaatitsinerussaaq aallakaatitsivimmiissallutik nuannersut Mala Johnsen aamma Jens-Christian Jacobsen, tassaassallutik aallakaatitassiami tassani aalajangersimasumik aallakaatitsivimmiittartussat. Aalajangersimasunik nipilersortartoqassaagut, timersornerup silarsuaanit ilanngussaqartassalluni, kulturimut tunngasunik aamma isiginnaartunut ornigullutillu isiginnaartunut tallimanngornerit tamaasa immikkut toqqakkanik ilanngussisoqartassalluni, pisortaq nangilluni oqaluttuarpoq.
Suliniut pissanganartoq
Aallakaatitassiamik taamatut ittumik piviusunngortitsiniarneq nuannersumik unamminartoqartitsisoq, assigiinngitsorpassuarnillu immikkut ilisimasalinnik pisariaqartitsilluni. Taamaammat KNRip tv-mik immikkoortortaqarfiata toqqarsimavaa avataaneersunik suleqatissarsiornissaq, N.U.I.F.-ilu, Kalaallit Nunaanni Timersortartut Kattuffiat aamma Tumit Production pissanganartumik suleqatigiinnissamut isumaqatigiissuteqarfigisimallugit.
N.U.I.F.-ip aallakaatitassiornermi tamani ornigullutik isiginnaartartussarsiornissaq isumagisassavaa pineqartut tassaapput peqatigiiffiit, sulisut peqatigiiffii assigisaallu unnuk ataaseq ornigullutik isiginnaartuunissaannut neqeroorfigalugit saaffigisassallugit.
Facebookimi uani facebook.com/unnuppaatman sumut qanorlu iliorluni KNRimut nammineq videolianik amerlasoorpassuarnik nassitsinissamut ilisimatitsissutit pissarsiarineqarsinnaapput.
- Nuannissaqaaq toqqaannartumillu aliikkusersuilluni aallakaatitassiorneq unamminartoqassalluni, qilanaaraarpullu nutaanik illup iluani avataaneersunillu suleqateqarnissarput. Neriuppugut isiginnaartartut aallakaatitassiarput nuannarissagaat, KNRimilu tamarmiulluta pilersaarutit malillugit suut tamarmik iluatsilluarnissaat kissaatigaarput, KNRip pisortaa Søren Lennert Mortensen naggasiivoq.
Paasissutissat suli amerlanerusut uani pissarsiarineqarsinnaapputTV-mi aallakaatitassanut pisortaq Jan Berg jbe@knr.glimaluunniit Piorsaavimmi pisortaq Niels Pavia Lynge npl@knr.gl 36 15 00.
