18-inik ukiulik umiatsiarluni ajunaartoq
Ikinngutigiit aqisserniarlutik aallarsimapput umiatsiamillu atorsimasaminnik taarsereersoq nunaqarfimminnut uterlutik aallarsimapput.
Qeqertarsuatsiaanit kilometerinik sisamanik-tallimanik ungasitsigisumi nunamut aporput, 18-inillu ukiulik apornerminni umiatsiamit kakataalluni. Nukappiaraq 15-inik ukiulik naapertorlugu angut 18-inik ukiulik katataanermini nunamut tussimavoq.
15-inik ukiullip 18-inik ukiulik nammineerluni umiatsiamut ikisinnaasimanngilaa. Aamma sumiiffigisaanni mobilit attaveqanngillat 15-inillu ukiullip VHF-radio ikissinnaasimanngilaa.
Nunaqarfimmut ikiortissarsiortariaqartoq
Taamaammat 15-inik ukiulik umiatsiamik apornerminni putungaatsiarsimasumik nunaqarfimmut ikiortissarsiorniarluni aalajangerpoq. 15-inik ukiulik nunaqarfimmiullu ajutoorfimmut pimmata 18-inik ukiulik imaaniilersimavoq ilisimajunnaaqqallunilu.
Qeqertarsuatsiaani nakorsiartarfeeqqamukaannarpoq, tassanilu paasineqarpoq timaa nillungaatsiarsimasoq niaqqumigullu ajoqusersimasoq. Kingunitsianngualu 18-inik ukiulik anerningerpoq.