Østerbromi qaartitsineq pillugu politiit 100-nit amerlanernik saaffigineqarsimapput

Innuttaasut 110-nit amerlanerusut Københavnimi Skattestyrelsenip illuani marlunngormat unnukkut qaartitsineq pillugu politiinut saffiginnissimapput.

Københavns Politi sisamanngornermi taama paasissutissiipput. Qaartitsinermi illup saqqaa aseruatiterluinnarpoq. Ilisimannittut arlallit oqarput Nordhavnip qimuttuitsunut qanittumukartaatinut unittarfiata eqqaani Østbanegademi qanngorpallannersuaq tusarsimallugu naqitsinerullu siaruarnera malugisimallugu.

PET (Politiit isertortumik paasiniaasartui) aamma Rigspolitiet (Naalagaaffiup politiivi) Skattestyrelsenimi qaartitsineq pillugu paasiniaanermi Københavnip politiivi ikiorlugit peqataapput.

Politiit tusagassiuutinut nalunaarummi innuttaasut taama amerlatigisut saffiginninnerat iluarisimaarluarneraarpaat.

- Ilumut ajasoornaqaaq, chefpolitiinspektøri Jørgen Bergen Skov oqarpoq.

AAMMA ATUARUK Ministeriuneq: Skattestyrelsenimi qaartitsineq piaarineruvoq

- Tamanna paasiniaasunut iluaqutaaqaaq, taakkumi inuit soqutiginartut qaartitsinerup siuninnguatigut kinguninnguatigullu qanoq ingerlasimanerinik paasiniaanermi ilisimannittut oqaluttuaat atorpaat, oqarpoq.

Nalunaaqutaq 21.45-p 22.15-illu akornanni inuit allat illoqarfiup ilaani tassaniissimasut politiinillu suli oqaloqatigineqarsimanngitsut politiit qinnuigaat saaffiginneqqullugit.

Gassi atorlugu saassussinerugunarpoq 

Kisianni tusagassiorfinnit apeqqutit amerlanerusut politiit sisamanngornermi ullo’qeqqata siornatigut akissallugit kisaatiginngilaat, assersuutigalugu qaarnerup sakkortuup peqqutaa pillugu.

Aarhus Universitetimi Institut for Kemi-mi (Kemi pillugu immikkoortoqarfimmi) ulluinnarni aqutsisoq Peter Hald naliliivoq gassi atorlugu saassussinerugunartoq.

- Svejserinermut atortoq imaluunniit ikumasoq saviminernut killuut atorlugu allakkanut nakkartitsivik matumiittoq iltimik gassimillu immeriarlugu ikillugu gassi atorlugu saassussinerunissaa ilimagaara, Peter Hald Ritzauimut pingasunngonermi oqarpoq.

Qaartartoq miloriuttagaq imaluunnit sullulimmik qaartartuliaq atorneqarsimasuuppat aseqqut imaluunniit assersuutigalugu aqquserngup sinaani allagartat sinimikkut ingitsiusattunik putullit takuneqarsinnaassagaluarput, oqarpoq.   

Politiit siusinnerusukkut oqaaseqaamminni erseqqissarpaat illumik saassussinerummat, inunniunngitsoq.

/ritzau/