Nunat 32-t silap pissusiata allanngoriartorneranik suliniuteqarpallaanngitsutut eqqartuussivilersuunneqartut
Portugalimiut arfinillit nunarsuup ataatsimut isigalugu annertunerpaamik 1,5 gradinik siunissami qaninnermi kiatsinnissaa suliniutiginiarlugu taakku Europap inuttut pisinnaatitaaffiit pillugit eqqartuussiviannut Strasbourgimiittumut maanna suliassanngortitsiniarput.
Allattoq Helle Nørrelund Sørensen
septembarip 27-at 2023 09:11
Nutserisoq Mads Lynge
Nunat 32-t, Danmark taakkununnga ilaalluni, silap pissusiata allanngoriartornera akiorniarlugu naammattumik iliuuseqanngillat.
Portugalimiut arfinillit taama isumaqarput. Nunarsuup ataatsimut isigalugu annertunerpaamik 1,5 gradinik siunissami qaninnermi kiatsinnissaa suliniutiginiarlugu taakku Europap inuttut pisinnaatitaaffiit pillugit eqqartuussiviannut Strasbourgimiittumut maanna suliassanngortitsiniarput.
Taakku suliniaqatigiiffimmit The Global Legal Action Networkimit sinniisuuffigineqarput.
- Eqqartuussivimmut suliassanngortitsisut arfinillit eqqartuussissuserisut 86-it akilerissagunaraat isumaqarpunga, suliniaqatigiiffiup qullersaa Gearóid Ó Cuinn oqarpoq.
Danmarkimi inuttut pisinnaatitaaffiit pillugit institutimi inatsisilerinermut tunngasuni pisortap Marya Akhtarip oqarnera naapertorlugu eqqartuussivitsigut suliaq una immikkuullarippoq.
- Inuttut pisinnaatitaaffiit pillugit eqqartuussivik silap pissusiata allanngoriartorneranut tunngasuni inuttut pisinnaatitaaffiit pillugit aatsaat siullerpaamik aalajangiisussanngorunarpoq, taanna oqarpoq.
Eqqartuussivitsigut suliassanngortitsisut maalaarutaat akuerineqassappat nunat 32-t eqqartuussivitsigut suliassanngortinneqartut silap pissusiata allanngoriartornera pillugu suliniuteqarnerulernissamut taava pisussaatinneqaratarsinnaapput.
Eqqartuussinermi qaammatit qulingiluat 18-illu iluanni aalajangiisoqarumaartoq ilimagineqarpoq.
Nunat eqqartuussivimmut suliassanngortinneqartut, Danmarkilu tassa taakkununnga ilaalluni, suliami immikkuualuttut akuersaanngilaat.
Nunani tamalaani silap pissusia pillugu politikki 2020-mi atuutsinneqartoq attanneqassappat nunarsuup ataatsimut isigalugu ukioq 2100-mi 3,2 gradinik kiatsinnerusimanissaa, Naalagaaffiit Peqatigiit silap pissusia pillugu ataatsimiittartoqatigiivisa siulittuutigaat.
