Borgmester: Timmisartuussinermi akit qaffasinnerat nunaqartunut mittatiginninneruvoq

Qeqqata Kommuniani borgmesterip Malik Berthelsenip (S) Air Greenlandimut isorinnippoq.  

Nunaqartunut nunatsinni timmisartuussinermi akit tusagassiuutinut aggustip 12-ianni nalunaarummi isornartorsiorpai. 

- Naatsorsuutigaaralu innuttaasut angalasinnaanissaat siunertaralugu pilersinneqarsimassasoq. Taamaattumik innuttaasut inorserujussuarluta akeqartitsinera isumaqarpunga innuttaasunut annertuumik mitalliinerusoq akuerineqarsinnaanngitsorlu, borgmesteri allappoq.

Malik Berthelsenip (S) Air Greenlandip akigititai ‘innuttaasunut mittatilliinertut’ isigai.<br>Suliffeqarfimmiilli akit inuiaqatigiinni akitsuinernut allanut sanilliussigaanni akitsoriartunnginnerunerat oqaluttuarineqarpoq.&nbsp; Photo : KNR

Borgmesterip oqarnera naapertorlugu, tusagassiuutinut nalunaaruteqarnermut aallaaviusoq tassaavoq takornariat nunanit allaninngaanneersut 2026-mi qaammatini arfinilinni siullerni amerleriarsimanerat, naatsorsueqqissaartarfimmit kisitsisaataannit kingullernit paasinarsinera. 

Borgmesterit akit pisiortortoqarnera ilutigalugu qaffattartut Air Greenlandimit oqaatigineqarnikuunerarpaa. Taamaammat angalasoqarnerunerani akisunerusarlutik.

- Soorunaana tupinnanngitsumik arlaleriarluta tusartarpagut ilaquttaminnut tikeraarusukkaluarlutik billetit akisuallaarujussuarneri pissutigalugit taamaatitsiinnartut.

KNR-ip Air Greenland attaveqarfigaa. Timmisartuutileqatigiiffiup isornartorsiummut oqaaseqannginnermini oqallinneq tamanna pingaaruteqartuunerarpaa.

- Allagaq billetit akii aamma innuttaasut namminneq nunaminni angalanissamut periarfissaat pillugit pingaaruteqartumik oqallinnissamik aallartitsivoq, Air Greenland oqarpoq.

- Air Greenlandip akissuteqarnermini matumani apeqqutit Qeqqata Kommunianit qaqinneqartut paasissutissanik ataqatigiinnernillu ilassuteqarfiginiarpai. 

Akit piffissami qaffasissut

Malik Berthelsenip isornartorsiuinermi Sisimiuniit Nuummut piffissami ulapaarnerpaaffimmi angalaneq 7.000 koruunit tikillugit akeqarsinnaanera erseqqissaatigaa.

- Eqqaamassavarput nunatsinni nunani allanisuulli imaasiallaannarluta angalanissatsinnut periarfissaqanngilagut, angalanerlu taamak akisutigitillugu nunatsinni innuttaasut nammineq akilikkaminnik kikkut akissaqarpat?, borgmesteri allappoq.

Air Greenlandip angalanissaq piffissaqarluarnermi pilersaarusiorneqartarnissaa kaammattuutigaa, taamaalilluni akikinnerusut atorluarneqarsinnaassallutik. Timmisartuutileqatigiiffiulli innuttaasut angalasariaqarnerminnut piffissaq pilersaarusiorluartuaannarsinnaanngikkaat oqaatigaa. Photo : KNR / Malik Brøns

Air Greenlandip piffissap ulapaarfiunerpaaffiup nalaata tikiliivinnginnerani,  akikinnerusut tamarmik nungoreerneranni ujartorneqaraangamik akit taamaattut nassaassaasinnaanerarpai.

- Taamaammat piffissami kingullerpaami, inissat tamangajammik nungoreerneranni akit nalinginnaasumik akigitinneqartunut takussutissiissutigineqarsinnaanngillat, timmisartuutileqatigiiffik allappoq.

Taamaammat Air Greenlandip angalanissamut piffissaqarluarnermi pilersaarusiortoqartarnissaa kaammattuutigaa. Taamaakkaluartorli taamaaliortoqarsinnaajuaannanngitsoq isumaqatigaa.

- Innuttaasut angalanissaminnut piffissami pilersaarusiortuaannarsinnaanngitsut isumaqatigaarput. Taamaammat inissaqartitsineq, aallartarfiit billertillu assigiinngitsut ingerlaavartumik sulissutigisarpagut, kisianni nunami angalattoqarpiarfiunngitsumi, isorartuumi ingerlatsinermilu aningaasartuutit qaffasiffigisaanni angalanissani tamani akikitsitsiuaannarsinnaanngilagut.

Akit qaffakkiartungaatsiannginnerarai

Malik Berthelsenip billetit akitsoriartuinnarnerarlugit allappaa.

Air Greenlandilli tamanna itigartitsissutigaa. Taakku kisitsisaatitik naapertorlugit taama ineriartortoqarneranik takusaqarsinnaannginnerarput.

- Piffissaq sivisunerusoq eqqarsaatigalugu Air Greenlandip agguaqatigiissillugu akigititai aningaasat nalinginnaasumik naleerukkiartorneranit annikinnerusumik qaffapput, timmisartuutileqatigiiffik allappoq.

- Tamanna billetit tamarmik akikinnerulernerannik isumaqanngilaq, kisianni ataatsimut akigititagut inuiaqatigiinni nalinginnaasumik akigitinneqartunitulli qaffatsiginngillat.

Malik Berthelsenip (S) naalakkersuisut pisortat politikerillu akuliuttussaannginnerannik tunngavimmik saneqqussinissaannik kaammattuuteqarfigai. Borgmesterip naalakkersuisut nipaannerat pissutsinik akuersineratut isiginerarpaa. Photo : KNR / Markus Valentin

Naalakkersuisunut suliassat

Air Greenland pisortat suliffeqarfiutaat politikerinit pisortaniillu akuliuffigineqartussaannginnermik tunngaveqarpoq. Tassa imaappoq suliffeqarfik imminut aquppoq, naalakkersuisullu ulluinnarni ingerlatsinermut akuliuttussaanngillat.

Taamaakkaluartorli Malik Berthelsenip akit qaffasissusaat naalakkersuisunit ilannguffigineqartariaqalersorai.

- Taamaattumik innuttaasut angalanissaminnut periarfissaarutsinneqarnerat Naalakkersuisut inuiaqatigiit sinnerlugit piginnittutut erseqqissumik tamanna akuerinagu oqariartuutigisariaqaraluarpaat, akuleruteqqusaannginneq utoqqatsissutigalugu nipangiusimaannarnagu, Malik Berthelsen allappoq.

- Nipangersimaannarnermi atugassarititaasunut akuersaaginnarnertut inuiaqatigiinnilu atugassarititaasunut aktieselskabet suneqarsinnaanngitsutut akisussaasunngortinneqarsimanerannik paasisassaavoq.

KNR-ip naalakkersuisut oqaaseqartinniarlugit attaveqarfigai, taakkuli saaffiginnissut uterfigeqqinngilaat.