”Unnu'manna tassaavoq, piorsarsimassuseq, nunatsinnilu pisut sammillugit aallakaatitassiaq immikkoortunut marlunnut avitaq katillugu 55 minutsinik sivisussusilik. Aallakaatitsivitsinni pulaartoqaatigaluta ilanngutassianik takusaqartassaagut sinerissamiillu oqaloqateqartassalluta. Unnu`mannarmiut: Pipaluk Egede Poulsen, Katrina Lindberg Boassen aamma Hans Jukku Noahsen
Sammisaq: Imminut toquttarneq sammissavarput.
Niviaq Korneliussen Lions klub Nuuk aammalu KNR suleqatigalugu podcastinik tassa tusarnaagassianik nangeqattaartunik aqqaneq-marlunnik immikkoortortalinnik saqqummersitseqqammerpoq, taannalu imminut toquttarnermut tunngavoq, unnummullu eqqartugassatsinnut aallaaviussalluni.
Naluneqanngilaq taamatut pisoqartillugu apeqqusiinerit qimagaasunit ilaqutaasunillu pigineqartartut, qanorlu iliussaagut? sakkussat suut pisariaqartinneqarpat? taamatut inissikkuma qanoq imminut ikiorniarsinnaavunga?
Naak eqqartugassagut oqimaassinnaagaluartut qanoq iliortoqarsinnaaneranik apeqqusiigutta neriuppugut arlaatigut iluaqutaasinnaassasoq.
Pulaartut marluk: Pulaartugut Niviaq Korneliussen aammalu tarnip pissusiinik ilisimasalik Niina Isaksen.
Messengerikkut marluk peqataasut: Messengerikkut peqataasut, Aqissiaq Nuka Semsen, tassaasoq imminut toquttarneq pillugu oqallitsitsisartoq aammalu pikkorissaasartoq, kiisalu Arnarák Patricia Bloch imminut toqunnisamik pinaveersaartitsinermi ilisimatusartoq.
