MIO: Atuartut angerlarsimaffiat nukittorsartariaqarpoq

Kujataani meeqqat nunaqarfimmiut atuarfik naammassigaangassuk amerlasuut ilinniariaqqinngitsoortarput. Meeqqat Illersuisuat nalunaarusiamini ilaatigut taama inerniliivoq.

AAMMA ATUARUK Kujallermi inuuniarnikkut naligiinnginnerujussuaqartoq

Kommunip meeqqat ineriartortinneqarnissamik ilinniaqqinnissamillu pisinnaatitaaffeqartinnissaannik pisussaaffini naammassinngilaa, illersuisoq nalunaarusiami allappoq.

Inuuniarnikkut ajornartorsiortut isumagineqanngitsut

Arlallit ilungersunartumik peroriartorsimapput, atuartullu angerlarsimaffiannut pigaangata inuuniarnikkut ajornartorsiutaat ajorsigaluttuinnartarput.

- Amerlasuut inuuniarnikkut ajornartorsiuteqarput, imigassartorfiusuni ilaqutariinniillutik sumiginnarneqarlutillu, meeqqat misigissutsikkut alliartornerannut inuttullu ineriartornerannut kinguneqartumik, Meeqqat Illersuisuat allappoq.

Meeqqallu inuuniarnermikkut ajornartorsiortut isumagineqarneq ajortut, atuartut angerlarsimaffianni sullissisut Meeqqat Illersuisuannut ilisimatitsissutigaat:

AAMMA ATUARUK Kujallermi meeqqat naligiimmik ikiorneqanngillat

- Isumaginnittoqarfik taakkununnga qangalili iliuuseqareersimasariaqaraluarpoq, Meeqqat Illersuisuat, Aviâja Egede Lynge, allappoq.

Immikkut ikorfartorteqalertariaqartoq

Meeqqat Illersuisuata kommunimut innersuussutigaa, meeqqanut atuartut angerlarsimaffianniileqqammersunut immikkut ikorfartorteqalissasoq.

Inuit Pisinnaatitaaffii pillugit Siunnersuisoqatigiit taamaattumik siusinnerusukkut inassuteqareerput - taannalu Nunatsinnut tamarmut atuuppoq.

Atuartut angerlarsimaffianni Nanortalimmiittumi 24-t najugaqarput Qaqortumiittumilu arfineq-pingasut.