Sjursen: Kalaallit arnat ikiorneqassapput

Kalaallit arnat Danmarkimiittut ilaat atortittartuunerminni aningaasanik akilerneqarnissartik pillugu atortittartuuneq ajorput, atortittarpulli unnuami siniffissaqarnissartik ilaatigut pissutigalugu, tamannalu arnanut annertuumik sunniuteqapiluttarpoq

Taama oqarpoq Inuuniarnermikkut Ajornartorsiutillit pillugit Siunnersuisooqatigiinni siulittaasoq, Jan Sjursen.

- Arnat atortittartut peeqqissutsimikkut innarlerneqartartut ilisimavarput, ilaatigut tarnikkut tamanna atorsaatigineqartarluni. Aamma ilisimavarput kalaallit arnat Danmarkimiittut ilaat inuuniarnermikkut ajornartorsiuteqartuunertik pillugu tamanna tarnimikkut annertuumik artorsaatigisaraat.

Inuuniarnermikkut Ajornartorsiutillit pillugit Siunnersuisooqatigiinni siulittaasoq, Jan Sjursen oqarpoq.

Kommunit ikiuunnissaat pingaaruteqarpoq

Taanna aamma oqarpoq, arnat ajornartorsiuteqartut kommuninit ikiorneqarnissaat pingaaruteqartuusoq.

- Inuit inuuniarnermikkut ajornartoriuteqartut aamma kalaallit, kommuninit isumagineqartarput, taakkuuppullu sutigut tamatigut aamma kikkunnik tamanik ikuuttussaasut, Jan Sjursen oqarpoq.

Aamma atuaruk Danmarkimi kalaallinik arnanik atortittartoqarpoq

Oqartussalli kisimik arnanik ajornartorsiuteqartunik ikiorsiisarnissaat naammanngitsoq, Jan Sjursen isumaqarpoq oqarlunilu namminneq piumassutimik suliniaqatigiiffiit ajornartorsiut tamanna pillugu aamma suliniuteqarsinnaasut.

- Assersuutigalugu taasinnaavara, Danmarkimi arnat atortittartut pillugit siunnersuisarfik, Redden Københavnimiittoq, kalaallinik arnanit aamma siunnersuisarmat, Jan Sjusen oqarpoq.

Randersimi immikkoortortaqarfik

Arnat kalaallit ulluinnarni ajornartorsiuteqartut taamatullu siniffissaqarniarlutik nerisaqarniarlutillu allatut ajornartormik atortittartuuneri pillugit, Aarhusimi Kalaallit Illuuttaat suliniuteqarnissamik pilersaaruteqarpoq. Tamannalu aallarnerlugu illoqarfimmi Randersimi immikkoortoqarfimmik aallartitsisut, Aarhusimi Kalaallit Illuutaanni pisortaq, Jørgen Holbech oqarpoq.

- Kalaallit arnat siniffissaqarnissaannartik pillugu atortittartuuneri qanoq naliginnaatigisoq paasiniassallugu ajornartorujussuuvoq, tassa tamassuma oqaloqatigiissutigineqartarnissaa paqumigineqartarmat.

Jørgen Holbech oqarpoq imalu nangilluni.

- Kalaallit arnat ajornartorsiutaat tamannarpiaq pillugu tulliani ataatsimeeqatigiinnissatsinni qulequtserparput, taamaalilluta ajornartorsiut tamanna qulaajaaffigeriassallutigu.

Aarhusimi Kalaallit Illuutaanni pisortaq, Jørgen Holbech oqarpoq.

Kalaallit Danmarkimi inuuniarnermikkut ajornartorsiortut pillugit, Inuuniarnermikkut Ajornartorsiutillit pillugit Siunnersuisooqatigiinnit misissuiffigineqartareerpoq. Misissuinermili tullermi kalaallit arnat inuuniarnermikkut ajornartorsiortut salliunneqassasut, Jan Sjursen oqarpoq.

- Ilimagaarput kalaallit arnat inuuniarnermikkut ajornartorsiuteqartut ikiaroornartunik angerlarsimaffeqannginnermillu ajornartorsiuteqarnermi saniatigut allatut ajornartumik aamma atortittartuusut, Jan Sjursen oqarpoq.

Taanna aamma oqarpoq, misissuinermi kingullermi paasineqarnat, siniffissaqannginneq pissutigalugu angutinik ilaqartarneq atortittartuunertut arnanit taaneqassalluni eqqunngitsutut isigineqarmat.