Issittup Ukiuinut atatillugu ilisimatusarnissanut aningaasaliisoqarpoq

Silap pissusaata allanngoriartornera nunatta aningaasaqarneranut qanoq sunniuteqarpa? Silap pissusaata allanngoriartornera immap naqqanut sunniuteqarpa? Nunatta sermersua qanoq oqimaatsigaa? Nunatsinni immikkut ittunik nappaateqarpa?

Tamakkua tassaapput apeqqutit ilaat ilisimatusartut 23 million koruunit danskit aningaasaqarnermut inatsisaanneersut atorlugit akissutissarsiniagassaat. Tassa Kalaallit Nunaanni ilisimatusarnikkut misissuinermut isumalioqatigiissitap suliniutissat arfineq pingasuusut suunissaat aalajangersimavaa. Isumalioqatigiissitap siulittaasua Minik Rosing ima nassuiaavoq:

- Suliniutit ataatsimut isigalugit issittumi avatangiisit ullumikkut qanoq innerannik ersersitsissapput, matumani ilanngullugit qanoq allanngoriartortoqarnersoq aamma inuiaqatigiit silap pissusaata allanngoriartorneranut qanoq qisuariarnersut.

- Kalaallit Nunaata ilisimasaqarfigilissavai pinngortitap avatangiisillu qanoq innerat aamma qanoq allanngoriartortoqassanersoq kiisalu allanngornerit tamakkua inuiaqatigiinnit qanoq qisuariarfigineqassanersut. Aammattaaq Kalaallit Nunaat soqutigineqarnerujussuanngussaaq.

- Aamma Kalaallit Nunaanni innuttaasunut ataasiakkaanut iluaqutaassaaq. Isumaqarpunga ikinnerpaat eqqarsaatigisaraat atuarfimmi uumassusilerinermi ilinniarneqartartut tassaammata ukiualuit matuma siornagut ilisimatusarnikkut paasisat. Aamma taama ingerlajuartuuvugut, ullumikkut tusartakkavut tassaapput siusinnerusukkut ilisimatusarnermi paasisat. Tassa ilisimatusarnikkut suliniutissat arfineq pingasuusut siunissami tamanut iluaqutaalerumaarput, Minik Rosing oqarpoq.

Ilisimatusarnikkut suliniutit siulliit ukiamut aallartinneqassapput. Ilisimatusarnerit naammassippata ilisimatusartut atuagassiatigut tamakkuninnga sammisaqarfiusartutigut paasisatik oqaluttuarissavaat. Taamaattorli issittup ukiuinut atatillugu ilisimatusartut paasisatik nutaat tusagassiorfiit aqqutigalugit uatsinnut inuinnaasunut oqaluttuarinissaat pisussaaffigaat.