Nunavumi Iqalunni pinerliinerit sooq qaffassimanersut politiit nassuiaatissaqartinngilaat. Kisitsisit atorlugit nalunaarsuusiornerit kommunimut sapaatip akunnera kingulleq saqqummiunneqarput, Iqalunnilu pinerliinerit qaffariangaatsiarsimasut takuneqarsinnaavoq.
Septemberip naanerani politiit 5.100-riarlutik ikiuiartoqqullugit sianerfigineqarsimapput. Siornamut sanilliullugu 1100-nik amerlanerullutik.
Nalunaarsuinerni takuneqarsinnaavoq inuit 1700-t isertitsivinni unnuisinneqarsimasut, ikiaroornartoq pillugu unioqqutitsisut marloriaatinngorsimasut, tillinniat persuttaasullu aamma amerliartortut takuneqarsinnaavoq. Taamaattorli kinguaassiutitigut pinerliinerit ikiliartorput.
Politiit pissutsit allanngornerat nuannarinngilaat nassuiaatissaqartinnaguli. Ilimagineqarporli imigassaq pisooqataasinnaasoq, pinerliisut amerlanerit imigassartorsimallutik pinerliisarmata.