Suleriaaseq nutaaq ujartorpaa
- Inatsisartuni ataatsimiittarnerit sivitsorneqartariaqarput. Inatsisiliorneq peqqissaarnerusoq akisussaassuseqarnerusorlu periarfissaqarnerulissammat, Asii Chemnitz Narup taama siunnersuuteqarpoq, nangillunilu:
- Inatsisartuni oqalliseriaatsit aqunneqarnerat ilusilerneqartarnerallu nutarterluinnartariaqarput. Uummaarinnerusumik oqallinneq ingerlanneqarsinnaaqqullugu akioriinnerit sukkanerusumik pisinnaalertariaqarput. Oqallittarnermi maanna periuserineqartut tunngavigalugit oqalussinnaatitaanermut piffissaliussat nutarterneqartariaqassapput.
Illuatungiliuttut ataatsimiititaliani siulittaasuutitaqalernissaat pisariaqartutut aamma oqaaatigineqarpoq.
- Illuatungeriilluni inissisimanerit, suliassat akisussaaffiillu isertuaatsumik ataqqeqatigiillunilu oqallisigineqarsinnaasariaqarput, Asii Chemnitz Narup oqarpoq.