Nuuk Snow Festival ullumik ataatsimik sioqqutsilluni naammassineqarpoq
Nuummi ippassaq issangialerpoq siallilerlunilu.
Nuummi apummik ilusilersuineq Nuuk Snow Festival blok P-ip atuarfiullu Ukaliusap eqqaani ingerlanneqarpoq. Apummik ilusilersuinermik unammineq aqagu aatsaat naammassineqartussaagaluarpoq, siallernerali pissutigalugu unammineq ullumi naammassineqarpoq.
Apummik ilusilersuilluni unamminermi 40-it peqataapput, suleqatigiit qulingiluaallutik. Ilusilersukkat takuniaraanni tuaviortariaqarpoq, Nuummi issangiarluni siallilertarpoq aatsinnagillu takusariaqarlutik, apummik ilusilersuinermik aaqqissuusseqataasoq Flemming Nicolaisen radioaviisimut oqaluttuarpoq.
Ilusilersukkat ilaat – Igloo mik taaguuserneqarsimasoq aalluni nakkaappoq.
Nuuk Snow Festival-imi ajugaapput Qaanaameersut – Qillaq Danielsen siuttoralugu apummik ilusilersuisut
Ilusilersugartik taasimavaat "Aqissiarsuaq".
