Qilaluagartassiissutit ilaneqarnissaat piumasarivaat
Karl Lars Nielsen ima oqarpoq:
- Qilalugartassat sukkasoorujussuarmik nungupput, qilalugaqarpallaarami, qilalugarpassuillu suli takkussuupput. Avannaani najugallit taama oqarput, Karl Lars Nielsen oqarpoq.
Upernavimmi piniartut isumaqarput qilalugartassiissutit ikinnerpaamik 50-inik ilasariaqaralurtut, Karl Lars Nielsen isumaqataavoq:
- Pisasseeqqinnissamulluunniit siunnersuutigineqartut ikippullunniit. Killilersugaanngikkallarmata pisarineqartartut 500-t missaanniittarput. Taamaammat 300-niit 500-nut ilaneqarsinnaagaluarput. Tamanna nungusaataanngitsumik pisinnaagaluarpoq, Karl Lars Nielsen oqarpoq.
Qilalukkat takkusimaaleraangata puisit tammartarnerat Karl Lars Nielsenip oqaatigaa, sikugaangallu aatsaat qaleralinniartoqalersarpoq:
- Taamaammat qilalukkanik qaqortanik pisasseeqqittoqartariaqaraluarpoq, puisit isumalluutigisartakkavut qilalukkat takkusimaaleraangata tammartarmata, Karl Lars Nielsen, Kullorsuarmi piniartut peqatigiiffianni siulittaasuusoq oqarpoq.
Qilalukkanik qaqortanik pisassiissutit 56-iusut tamakkerlutik pisarineqarsimalernerat Kommuneqarfik Upernaviup sisamanngormat nalunaarutigaa.
Qilalukkanik qaqortanik piniarneq ukioq manna juulip aallaqqaataaniit atuutilersinneqarpoq, aappaagulu juunip 30-ata tungaanut piniartoqarsinnaagaluarluni.
