Qilaluagartassiissutit ilaneqarnissaat piumasarivaat

Qilalukkat qaqortat 56-it Upernaviup Kommunianut pisassiissutigineqartut maanna pisarineqareerput, tamarmillu Kullorsuup eqqaani pisarineqarlutik, piniartoq Karl Lars Nielsen naapertorlugu Kullorsuarmiuinnaat qilalukkanik qaqortanik pisaqartuunngillat, piniartummi Upernaviup nunaqarfiisa ilaanneersut aamma piniaqataapput.
Allattoq Mads Lynge
oktobarip 13-at 2008 16:42

Karl Lars Nielsen ima oqarpoq:

- Qilalugartassat sukkasoorujussuarmik nungupput, qilalugaqarpallaarami, qilalugarpassuillu suli takkussuupput. Avannaani najugallit taama oqarput, Karl Lars Nielsen oqarpoq.

Upernavimmi piniartut isumaqarput qilalugartassiissutit ikinnerpaamik 50-inik ilasariaqaralurtut, Karl Lars Nielsen isumaqataavoq:

- Pisasseeqqinnissamulluunniit siunnersuutigineqartut ikippullunniit. Killilersugaanngikkallarmata pisarineqartartut 500-t missaanniittarput. Taamaammat 300-niit 500-nut ilaneqarsinnaagaluarput. Tamanna nungusaataanngitsumik pisinnaagaluarpoq, Karl Lars Nielsen oqarpoq.

Qilalukkat takkusimaaleraangata puisit tammartarnerat Karl Lars Nielsenip oqaatigaa, sikugaangallu aatsaat qaleralinniartoqalersarpoq:

- Taamaammat qilalukkanik qaqortanik pisasseeqqittoqartariaqaraluarpoq, puisit isumalluutigisartakkavut qilalukkat takkusimaaleraangata tammartarmata, Karl Lars Nielsen, Kullorsuarmi piniartut peqatigiiffianni siulittaasuusoq oqarpoq.

Qilalukkanik qaqortanik pisassiissutit 56-iusut tamakkerlutik pisarineqarsimalernerat Kommuneqarfik Upernaviup sisamanngormat nalunaarutigaa.

Qilalukkanik qaqortanik piniarneq ukioq manna juulip aallaqqaataaniit atuutilersinneqarpoq, aappaagulu juunip 30-ata tungaanut piniartoqarsinnaagaluarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq