Namminersornerullutik Oqartussat inissiaataat agguaakkusuppai
Naalakkersuisunut ilaasortaq Kim Kielsen Sermitsiami ullumikkut saqqummersumi isumassarsiaminik taama saqqummiussivoq. Tamanna qisuariaataavoq, A/S Inip marlunngormat immikkut ittumik ataatsimeersuarnerani, inigisamut akiliutinut qaffaatissatut siunnersuutigineqaraluartut, aserfallatsaaliinermut atorneqartussaagaluit peerneqarmata.
- Siunnersuutaasinnaasut pitsaasut tamaasa tusarusuppakka. Allaat Namminersornerullutik Oqartussat inissiaataasa 7.500-uusut tamarmik attartortunut tunissutigineqarnissaat siunnersuutigineqassappat tamanna tusarusuppara, taavalu piginnittuulersussat namminneq inigisamik aserfallatsaalinissaat akilissavaat, Kim Kielsen Sermitsiamut oqarpoq.
Kim Kielsen suleqatigiissitamik, Namminersornerullutik Oqartussat inissiaataannik aserfallatsaaliinissamut kinguartoorutinik 2,1 milliardit koruuninik nalilinnik iliuuseqarnissamut nassaarniartussanik pilersitsisimavoq.