USA aamma Rusland pitsaanerusumik attavaqaqatigiinniarput

- USA-p Ruslandillu akornanni attaveqaqatigiinneq ilorraap tungaanut saakkiartorpoq, USA-milu aqutsisut nutaat tamanna erseqqissarpaat, Sergej Ivanov, Joe Bidenimik ataatsimeeqateqareernerup kingorna oqarpoq.

USA-p Ruslandillu attaveqaqatigiinnerat George W. Buship præsidentiugallarnerani pitsaavallaanngilaq maannali allanngulerunarluni:

- Attaveqaqatigiinnerput pitsanngoriartornissaa neriulluarfigaarput, Ivanov oqarpoq.

Isumannaallisaaneq pillugu nunat tamalaat ukiumoortumik ataatsimiinneranni Joe Biden USA sinnerlugu peqataavoq, oqalugiartunullu ilaalluni. Joe Bidenip ilaatigut oqaatigaa nunat taakku marluk akornanni oqaloqatiginnerit ingerlalluartut, nutaamillu iliuuseqalersaartoqartoq.

USA-p qaartartunut ungasissumiit igeriuttakkanut Europap kangisissuani illersuusiaa Ruslandimit iluarineqanngeqisoq peerneqaratarsinnaavoq, Barack Obama ilaatigut taama oqarami.