Olena Zelenska: Nunat killiit Ukrainemi eqqisseqatigiittoqarnissaa pillugu akisussaaffik avittariaqarpaat
Ukrainemi sorsunnermi eqqisseqatigiittoqarnissaanut, Ukrainep præsidentiata Volodymyr Zelenskyj-p siunnersuutaa iluatsissappat, taava siunnersuummi immikkoortut qulit nunat killiit akunnerminni avittariaqarpaat.
Ukrainep præsidentiata nulia Olena Zelenska taama oqarpoq.
Olena Zelenska Schweizimi aviisimit Neue Zürcher Zeitungimit apersorneqarpoq, nunammi tamalaat nunani tamalaani aningaasarsiorneq pillugu Schweizimi Davosimi ataatsimeersualeruttorput.
Nunat killiit Ukrainep sakkussanik pilersorneqarneranut atatillugu iliuuseqanngippallaartut taanna isumaqarpoq, tamannalu inuit inuunerannik naleqartoq oqaatigalugu, soorlu aamma nunap atortulersugaanerata eqqorneqarneruneranik kinguneqarsimaneraraa.
Zelenskyj-p siunnersuutaa assigiinngitsunik imaqartoq
Inuussutissanik pilersuisoqarsinnaanissaa, eqqisseqatigiinnissamut isumaqatigiissusiortoqarnissaa, russit sakkutuuisa Ukrainemit aninissaat, atomimillu nukiliorfiit Ukrainemiittut isumannaatsuunissaat Zelenskyj-p kissaatigaa, soorlu aamma russit sakkutuuisa sorsunnermi pinerluttuliorsimasutut nunat tamalaat eqqartuussivianni eqqartuunneqarnissaat pillugu misissuisoqarnissaa piumasarigaa.
Ukrainemi sorsunnermi eqqisseqatigiittoqarnissaanut isumaqatigiissutip nunanit tamalaanit tapersersorneqarnissaa, Volodymyr Zelenskyj-p qaammatit marluk kingulliit marluk ingerlaneranni sukataarutigisimavaa.
Nunat suiffissuaqarfiusut G7-it siorna novembarimi ataatsimeersuarmata Zelenskyj-p eqqisseqatigiinnissamut siunnersuutini siullerpaamik saqqummiuppaa, nunanilu tamalaani naalakkersuinikkut aqutsisut nuimanerit siunnersuummik tapersersuillutillu oqallinnissaat sukataarutigisimallugu.
Ruslandip siunnersuummi immikkoortut ilaat itigartissimavai. Ukrainemimi nunap immikkoortuisa sisamat tiguarnikuusami Ukrainemut utertinneqarnissaannut piumasaqaat Ruslandip akuersaarumanngilaa.
