Naja Kastrup Solvig (saamerleq) Malika Esther Nornildilu (talerperleq.) politikeritut ulloq ataaseq sulinissaminnut qilanaarput.Foto: KNR

14-inik ukiullit Folketingimi ataatsimeeqataasussat: Nunatsinni inissiat oquttut amerlaqaat

Nuuk Internationale Friskolemeersut marluk politikeritut ulloq ataaseq sulillutik Folketingimi ataatsimeeqataasussanngorput. Taakkulu inissiat oqullit ataatsimiinnermi oqaluuserisassanut ilannguppaat.

Nuuk Internationale Friskolemi atuartut nukappiaqqat ilaat nalaasaarput, allat anitsiareerlutik klassiminnukaapput niviarsiaqqallu allap atuaqatini, Malika Esther Nornild, nujaginnerarpaa.

Tassa Nuuk Internationale Friskolemi 9.klassertut ilaat marluk 14-inik ukiullit, Malika Esther Nornildip Naja Kastrup Solvigillu, atuarneranni ulluinnarni pisartut taakkuukkajupput.

Niviarsiaqqalli taakku marluk atuanngiffeqarallartussaapput. Taakkumi marluullutik inuusuttut Christiansborgimi januaarip 30-ani ataatsimiinneranni peqataassapput.

Taakkulu marlulluutik Folketingimimi ataatsimiinnermi oqaluuserisassanut ilanngussaat tassaapput: Inissiat oqullit.

- Nunatsinni inissiat oquttut ajoraluartumik amerlaqaat, Malika Esther Nornild ilumoorsaarluni oqarpoq.

Naalagaaffeqatigiinni inuusuttut 8.klassemi 9. klassemilu atuartut Folketingimi ataatsimeeqataasussat katillutik 179-iupput. 

Atuartut taakku oqaluuserisassatut inuiaqatigiilerinermik ilinniartinneqarnerminni siunnersuutaasa ilaat aallaavigalugit ataatsimeeqataasussatut toqqagaapput – politikeritullu ulloq ataaseq sulinerminni Folketingimi ataatsimiititaliami oqaluuserisassanngortitsissapput, ministerinut apeqquteqassapput, oqaluuserisassanngortitaminnik oqaluttarfimmi tunngavilersuissapput oqaluuserisallu pillugu taasissapput.

Nunatsinni inissiat oqullit tamarmik ukiuni tulliuttuni killissaliilluni ingutserneqassasut inissiallu nutaat ataavartumik nutarterneqartassasut, Malika Esther Nornildip Naja Kastrup Solvigillu siunnersuutigaat.

Inissiat pitsaanerusut

Niviarsiaqqat marluk taakku Nuummeersuusut maanna inigisaat oqoqanngillat, Naja Kastrup Solvigili oqulimmi najugarnikuulluni.

- Meeraagallarama oqulimmi najugaqarpugut, taanna oqarpoq.

Taassuma oqulummi najugaqarneq qanoq misigisimanarnersoq eqqaamanngilaa, ilaqutaatali eqqaamavaat:

- Ataatagalu tamannalu eqqartoratsigu iliuaalliulertasimanerparpoq, niaqorluttarsimanerarpoq ippigusuttarsimanerarlunilu. Taamanikkut angerlarsimaffipput silaannaluttarsimaqinerarpaa.

Taamaammat tamatuma oqallisigineqarnissaa pingaartuusoq, taanna isumaqarpoq.

- Inissiani oquttuni suli najugaqartoqartoq tusaraangakku, inuit taakku naakkigiummertarpakka, tassami qanoq iliuuseqarfigingaarsinnaanngilagut. Inissiammi akisoqimmata, inuit taakku allamut nooriaannaariaasanngillat, Naja Kastrup Solvig oqarpoq.

Atuartullu taakku marluk politikerit sulisarnerattut ataatsimeeqataanissaminnut piareersaleruttorput.

Malika Esther Nornildilu siunnersuutissaqalereerpoq:

- Kikkulluunniit toqqissisimasumik pitsaasumillu angerlarsimaffeqarsinnaaqqullugit, Inissiat oqullit oquiarneqassapput. Inissiallu tamarmik oqoqarnersut qaammatit pingasukkuutaartumik misissorneqartalertariaqarput, taanna oqarpoq.



Giv os et tip

Send en SMS til 1717

Skriv Unnia og derefter dit tip og send sms'en til 1717.
(du kan også skrive Tip i stedet for Unnia)

Giv os dit tip på knr.gl/1717

Eller send en email 1717@knr.gl