Kulusummiit ingerlariaqqinnaveertut erloqisut: Air Greenland iliuusai naammanngilluinnarput

Kirstine Davidsen aamma Margrethe Nielsen Tasiilamiit ippassaq pingasunngornermi Nuummukartussaagaluarput. Angalaniarnerminilu Kulusummit ingerlariaqqinngitsoorput, angalatitsivimmiillu Air Greenlandimiit ikiorneqaratik.

Ilaasut nerinissaminnut Air Greenlandimiit kortinnassimagaluarput, nerisassalli naammanngillat.

- Nuummut ingerlaqqinniarunnaaratta nerinissatsinnut kortimik pinnappugut. Mittarfiup kioskoani pølsinik toastinillu tuniniaapput, taakkuninnga neriniarluta siuleriaatilerpugut, uangali kingullerniikkama nunguussaavunga, nerisassaatituai nungupput.

- Taamaammat uanga kaattorujussuanngorpunga, Margrethe Nielsen oqarpoq.

Kulusummi mittarfiup sermernarnera peqqutigalugu Air Greenland missinnaanngimmat taamaatiinnarpoq.

Air Greenland matoreersoq timmisartoq ualikkut tallimat missaani taamaatiinnartoq, Kirstine Davidsen oqaluttuarpoq.

Taanna Kommuneqarfik Sermersuumi angajoqqaarsialerinermut aqutsisutut atorfeqarpoq. Atorfimminullu atatillugu Tasiilamut angalagami ippassaq pingasunngornermi Nuummut uterniarluni Kulusummiit ingerlariaqqinngitsoorput.

Timmisartoq tikinniarunnaarmat ilaasulli Tasiilaliaanneqassasut neriorsorneqarput, Kulusummi Hotelimi inissaqanngimmata, kisianni:

- Kisianni Tasiilamiit aaneqanngilagut, taava saaffiginnitarfimmut saaffiginnikkama paasitinneqarpunga qulimiguulimmik aquttup tiimissani tamakkerlugit atoreersimagamigit ullumikkut timmeqqissinnaannginnami aasinnaanngikkaatigut, Kirstine Davidsen oqaluttuarpoq.

- Saaffiginnittarfimmi sulisup Air Greenland pissarsiariniaraluarpaa matoreersimammalli iluatsinngitsoorpaa. Taava tassa tamaani qeqqiinnarluta nalulerparput qanoriliussanerluta, unnuiffissaqartinneqaratalu nerisassaqartinneqanngilagut.

Mittarfeqarfiit ikiuuttut

Air Greenland iliuuseqanngimmat, Mittarfeqarfiup Kulusummi sulisui angalasussaagaluit unnuiffigisinnaasaanik ujaasillutik aallartipput.

Kulusuup nunaqarfittaani illunnguamik unnuiffigisinnaasaannik nassaarput. Nunaqarfiulli pisiniarfiat matoreerpoq.

- Inuit qulit illunnguamut anginngitsumut marlunnik sinittarfilimmut unnuiffissarsineqarput. Sinittarfiup aappaani inuit tallimat imminnut ilisarisimanngitsut sineqatigiittussanngorlugit, sinittarfiup aappaani aamma taamatut. Inuit qulit anartarfeerannguaq ataaseq tamarmiuttussanngorpaat, nerisassaqanngillat illu sivisuumik inoqarsimanngimmat kiassarsimanngilaq, Kirstine Davidsen oqarpoq.

- Uanga iluatsitserujussuarpunga. Nunaqarfimmi najugallip aallunga angerlaakkaminga nerisillunga siniffeqartillungalu. Pisumut tupigusunnermut Facebookikkut toqqaannartumik oqaluttuarama susoqarneranik, taava nunaqarfimmi najugallip takusimallugu ikioriartoraanga, uffa ilisarisimanata.

Margrethe Nielsen suliffinni aqqutigalugu nunatta sineriaani angalakulasuulluni oqaluttuarpoq, taamalu erloqinartigisumik nalaataqarnikuunani, taanna KNR-imut oqaluttuarpoq.

- Nunatsinni angalasaqaanga, kisianni assingusumik nalaataqanngisaannarnikuuvunga. Tujorminaqaaq. Tujorminaqaaq taamatut pineqarluni.

Utoqqatserfigineqarusupput

Kulusummi mittarfik nunaqarfimmut 2 kilometerisut ungasitsigisumiippoq, aputeqaqaaq siallerlunilu.

Ilaasut uniinnartut nunaqarfimmut unnuiartorfissaminnukarnissartik namminneq isumagissavaat. Taakku pisunngikkunik qamuteralannik aatissinnaapput, aatinniaraannili inuk ataaseq siumuinnaq 350 koruuninik akeqarpoq.

Ilaasut namminneerlutik angallanneqarnissartik akilertussaavaat. Taamatullu nalaataqarneq Kirstine Davidsenimit erloqinartippaa.

- Kanngunaqaaq ilaasut taamatut pineqarsinnaammata. Napparsimasumik aamma ilaasoqateqarpugut, qujanartumilli ullumikkoqqissaaq angalasut meerartaqanngimmata. Isumaqarpunga Air Greenlandip minnerpaamik utoqqatsernissani iliuusissarigaa, taanna KNR-imut oqarpoq.

Air Greenlandip ilaasuni taamatut nalaataqartut qanoq iliuuseqarfiginiarnerai KNR-imiit apeqquteqarfigaagut, piaarnerpaamillu akissuteqassallutik taakku KNR-imut neriorsuipput ulloqeqqa sioqqullugu qulinngortoq. Ualisoq sisamat qeqqartoq suli akissuteqanngillat.

Kulusummiit ingerlariaqqinnaveertut ullumikkut aaneqarnissaminnik neriorsorneqaqqikkaluarput, sulili sermernarmat aqagumut aaneqarnissaat kinguarteqqinneqarpoq. Tasiilamut utaqqiartussasut ilisimatinneqarput.

Air Greenland ajuusaartoq.

- Ajuusaarutigeqaarput Kulusummi ippassaq nalaanneqartoq. Tassa timmisartoq aallarfissaanut qanillivittorlu timmisartoq uneriataarpoq, peqquteqarluni. Tassa timmisartumut sermernarsinnaanera ulorianarmat. Taamaalisoqarnera immikkuullarilluinnarpoq, tamannalu ajuusaarutigiinnarsinnaavarput, Air Greenland KNR-imut mailikkut allappoq.

- Taakku ullumi aaneqarnissaannik timmisartumik piareersigaluarpugut, kisianni suli sermernarnissaa suli aarlerinaateqarmat iluatsinngitsoorpoq.

Angalasullu aningaasartuutigisimasaat matussuserneqassasut timmisartuutileqatigiiffiup paasissutissiissutigaa.

- Ilaasut akiliinerminni uppernarsaatini assileriarlugit gohvagthavende@airgreeenland.gl-imut nassiutissavaat, taava aningaasat taakku nalingi taarserneqassapput, Air Greenland allappoq.