Qasigiannguani tunillatsittut amerlanerat pissutigalugu Naalakkersuisut killilersuinernik atuutilersitsipput

Qasigiannguani tunillatsittut amerlanerussuat pissutigalgu politikikkut aalajangiisoqarpoq. 

Coronamik tunillatsittut killilersimaarniarlugit Naalakkersuisut Qasigiannguani killilersuinernik nutaanik atuutilersitsipput.  

Killilersuinerit decemberip ulluisa tallimaata tungaanut atuukkallassapput. 

AAMMA ATUARUK Qasigiannguani atuarfiup pisortaa: Taama nalaataqarnikuunngilagut

Soorlu aamma Nuummi Upernavimmilu innuttaaasut assigalugit, Qasigiannguani innuttaasut akiuussuserneqarsimanerminnut imaluunniit tunillatsissimannginermut uppernarsaatitik takuteqqaartussaavaat pisortat allaffeqarfiinut iserniarunik. Uani pineqarput, atuakanik atorniartarfiit, illup iluani aamma silami timersortarfinni, timigissartarfinni arsaattarfinnilu.

Ulluinnarni pisiniarfinni pisiniartoqarsinnaavoq

Taamaakkaluartoq tamakkiisumik akiuussutissamik kapitissimanngikkaluarluni aamma misissortissimanngikkaluarluni ulluinnarni pisiniarfinni pisiniartoqarsinnaavoq, soorlu allakkerivinni, mittarfinni, niuertitsivinni, sullissiveqarfinni il.il isersimaannaartoqarsinnaasoq.
Inini kikkunnit tamanit iserfigineqarsinnaasuni sulissagaanni imaluunniit piffik sullivissaq isersimaffigisinnaassagaanni PCR atorlugu Covid-19-imut misissortissimanissaq aamma misissortinneq minnerpaamik 48 tiimit qaangernagit pisoqaassuseqartoq imaluunniit tamakkiisumik akiuussusersimanissaq uppernarsarneqarsinnaasariaqarpoq

Inini kikkunnit tamanit iserfigineqarsinnaasunit, atuisunut attaveqartarfinni niuertarfiit aamma kiffartuussiviit isersimaniaraanni aamma tamanut angallassissutini ilaaniaraanni taamatuttaaq qanermut imaluunniit kiinnamut assiaquteqarnissaq piumasaqaataavoq.

Killilersuutit maannakkumut atuuttut sapaat 5. december 2021 ilanngullugu atuupput, Naalakkersuisut tusagassiuutinut nalunaaruteqarlutik taama allapput.