Canadami katuullit nunap inoqqaavinut utoqqatsertut

Nunap inoqqaavi kinguaassiutitigut atornerlugaasimanngikkunik iluamik ilaatigut nerisinneqartarsimanngillat.

Biskoppit aatsaat siullerpaamik utoqqatserput.

Utoqqatserneq Canadami biskoppit peqatigiiffiata The Canadian Conference of Catholic Bishopsip tusagassiutinut nalunaarutaanni tallimanngornermi takuneqarsinnaavoq.

Najugaqarfigiitigalugu atuarfiit isornartorsiorneqaqisut 1831-mi atorneqalerput, kingullerlu 1996-imi matuneqarluni.

Canadami nunap inoqqaavisa kulturertik tunullugu nunat killiit kulturiat tunuliaqutaralugu inuulernissaat najugaqarfigiitigalugu atuarfiit siunertaraat.

AAMMA ATUARUK Canada: Nunap inoqqaavisa meeraat pillugit erfalasoq qiteqqunneqassava?

Meeqqat angajoqqaaminnit arsaagaallutik atuariartortinneqartarsimapput, iluamillu nerisinneqartarsimanatik, soorlu aamma timikkut tarnikkullu assigiinngitsutigut atornerlugaasarsimasut.

Taamatut iliuuseqartarsimanerit ataatsimiititaliarsuup misissuisitsisup kulturikkut inuiannik toqoraanertut 2015-imi taavaa.

Ilagiit katuullit ukiorpaalunni isornartorsiorneqarput, najugaqarfigiitigalugumi atuarfiit amerlasuut ilagiit katuullinit ingerlanneqartarsimammata.

Meeqqat najugaqarfigiitigalugu atuarfiisa eqqaanni meeqqat toqunneqarsimasut timaat hunnorujulikkaat nassaarineqareersullu isornartorsiuinerit sakkortusiartuinnarsimapput.

- Ilagiit katuullit akornanni atornerluisoqartarsimanera nassuerutigaarput . Timikkut, tarnikkut, anersaakkut, kulturikkut kinguaassiutitigullu atornerluisoqartarsimavoq, biskoppit tusagasssiutinut nalunaarummi ilaatigut oqarput.

- Nunap inoqqaavisa oqaluttuarisaaneranni naapertuilluanngitsuliortoqartarsimanera nassuerutigaarput, nunallu inoqqaavisa akornanni kingunerluuteqartoqartoq nassuerutigaarput, biskoppit oqarput.

Paavi, ilagiillu katuullit ataatsimut isigalugit pisimasut pillugit suli utoqqatsersimanngillat.