Qeqertaq nutaaq nunatta avannarpiaani nassaarineqartoq

Kalaallit Nunaat alliallappoq.

Qeqertarlu nutaaq avannarpasinnerpaatut nalilerneqarpoq.

Ilisimatuut qeqertamut avannarpasinnerpaamut, Oodaaq-mut, misissuiartorlutik tikipput.

Kingornali Oodaamiinnatik paasileriasaarpaat. Qeqertamummi allamut avannarpasinnerusumut tikissimapput.

AAMMA ATUARUK Kalaallit Nunaata avannarpiaani qeqertamik nutaamik nassaartoqarpoq

- Qeqertaq avannarlerpaatut nalunaarsorneqarsimasumut, Oodaaq-mut, tikissimalluta ilimagiivikkaluarparput .

- Kisianni assit sumiiffiilu attaveqaatikkut saqqummiukkakkit, Amerikamiut qeqertanik ilisimasallit upperiuminaatsillugu qisuariangaatsiarput, Morten Rasch Københavnip universitetianeersoq oqarpoq.

Qeqertaq suli atserneqanngilaq

Qeqertaq Oodaaq-miit 780 meterinik avannarpasitsigisumi nassaarineqartoq suli atserneqanngilaq.

Qeqertaq nutaaq sanimut 30 meterinik tukimullu 60 meterinik angissuseqartoq, immamiit meterinik sisamanik portussuseqarpoq.

Qeqertaq nutaaq nassaarineqartoq Naalagaaffeqatigiit annerulersikkaa, Københavnip universitetianeersut oqarput.

- Oodaap qeqertaaniisoriniarluta, GPS-inni ajortoqartoq DTU ikiortigalugu paasilerparput. Sunaaffali avannarpasinnerusumi qeqertamik nutaamik nassaarluta, nassaarnitsinnilu kunngeqarfik allineqarpoq, Morten Rasch oqarpoq.

Marulluk sermillu nassataa

Qeqertaq immamiit nuisalaarluni marullummiit sermillu nassataaneersoq, Morten Rasch oqarpoq. Tamannalu anorersuarniit immallu naqqaaniit katersuussimassangatinneqarpoq.

Qeqertaq atanavianngitsutut nalilerneqarpoq, taamaammallu qanoq sivisutigisumik Kalaallit Nunaata naalagaafiullu allinera atatigissanersoq, Morten Raschip nalornissutigaa.

- Kialluunniit naluaa qanoq sivisutigisumik atassanersoq. Imaasinnaavoq anorersuaqattaarnerani tammaqqittoq, Morten Rasch oqarpoq.