Nunavut matoqqagaluatoq coronamik tunillatsittut amerlisut

Nunaqarfinni illoqarfinnilu sisamani tunillatsittoqarpoq. Tunillatsittoq siulleq Sanikilumi sapaatit akunnerisa siuliani tunillatsippoq. CBC Newsili naapertorlugu sumiiffimmi tassani tunillaassuuttoqanngitsoq Nunavummi peqqinnissamut pisortaq Michael Patterson oqarpoq.

Nunavup kitaata sineriaani sumiiffiit allat pingasut tunillatsiffiusut tassaapput

Rankin Inlet inunnit 2800-inik najugaqarfigineqartoq, taassuma kujataatungaani nunaqarfik Whale Cove 435-inik najugaqarfigineqartoq aamma kujasinnerusumi Arviat 2600 missaanik inulik. Taakkunani pingasuni Arviat eqqornerlunneqarnerpaavoq. Taakkualu tunillaassuuffiusut pingasut, motoorimik ingerlatilinnik ingerlalluni imminnut tikissinnaasumiipput.

Nunavummi naalakkersuisut siulittaasuat Joe Savikataaq tunillaassuuffiusumit Arviaminngaanneerpoq. Malittarisassallu sukangasuut tassa, pisariaqavitsinnagu aneqqusaannginneq, qanermut assiaquteqarneq ilaquttallu kisiisa ilaginissaasa malinnissaat qanoq pingaaruteqartiginerat Nunavummiunut arlaleriarluni oqaatigisareerlugu.

Naalakkersuisut siulittaasuata malittarisassat malilluinnaqqissaarnissaat pingaartumik meeqqanut malikkuminaassinnaasut nuanniissinnaasullu nalunagu Nunavut Newsimut oqarpoq.

Taassuma saniatigut nunaqqatigiit tamarmik imminnut nalunngimmata kikkut tunillaassuutitsinersut pisuutitsissutigeqattaassallugu iluaqutaanngitsoq Joe Savikataap sapaatit akunnerata ingerlanerani arlaleriarluni oqaatigisaqattaarpaa.