Ajutoortoqarsimatillugu missuisartut umiusup Estoniap timitaani putorujussuaq misissorniaraat
Umiarsuup ilaasartaatip, Estoniap, 1994-imi umiusup timitaani putoq alla nassaarineqaqqammerpoq, umiarsuullu ajutoornera ajutoortoqarsimatillugu Sverigemi misissuisartunit maanna misissoqqinneqartussanngorpoq.
Umiarsuup umiuneranut piviusulersaarutip immiunneranut atatillugu aqqartartoq ungasianit aqunneqarsinnaasoq atorneqarmat, Estoniap timitaani putoq siornatigut takuneqarsimanngitsoq siumorneqarpoq.
Putoq qummut 4 meteritut sanimullu 1,2 meteritut angitigaaq.
Ilaasartaatip siuata ammartakkap katanneratigut umiarsuaq taamanikkut umiusoq, ajutoortoqarsimatillugu Sverigemi misissuisartut 1994-imi inerniliuppaat, umiarsuaq nalunaaquttap akunnerata ataatsip ingerlanerani taamanikkut kivivoq.
Ataatsimoorullugu misissuisussaqartussanngorunartoq
Inuit 852-it ajunaarput, taakkunanngalu amerlanerit svenskisut innuttaasssuseqarlutik.
Paasissutissat nutaat ajutoortoqarsimatillugu Sverigemi misissuisartunit maanna nalilersorneqassasut, Sverigep ministeriunerata Stefan Löfvenip, nunamullu namminermut ministerip Mikael Dambergip sapaatit-akunnerata massuma ingerlanerani innersuussutigaat.
Paasissutissat nutaat, ajutoortoqarsimatillugu Sverigemi mississuisartunit maanna nalilersorneqassasut, ajutoortoqarsimatillugu misissuisartut qullersarigallagaata, Jonas Bäckstrandip, aviisimut Aftonbladetimut oqaatigaa.
Finlandip, Estlandip Sverigellu nunanut allanut ministeriisa oqaatigaat ataatsimoorullugu maanna misissuisussaqartussanngorunartoq.