Nannut pingajoqqat Qeqertarsuatsiaat eqqaanniit qimaatinneqartut

- Nannut pingajoqqat nikikkumanngimmata tungaannut seqqortariaqarsimavunga. Qeqertarsuatsiaanniit kilometerinik tallimanik maanna ungasitsigisumiillutik ilorpartereerput.

Piniartoq Qeqertarsuatsiaamiu, Ole Henriksen, taama oqarpoq.

Nannut pingajoqqat ullaap tungaani Qeqertarsuatsiaat eqqaanniipput.

Taakkua Ole Henriksenip oqarnera naapertorlugu Qeqertarsuatsiaat akianni 300 meterinik ungasitsigisumi qeqertameerujoorsimapput.

- Neriuppunga utissanngitsut. Uteratarnissaannullu piareersimassaanga, Ole Henriksen KNR-imut oqarpoq.

Narajorlutik tamaanga pisimassasut

Aalisarnermut, Piniarnermut Nunalerinermullu Naalakkersuisoqarfiup Qeqetarsuatsiaanni kommunefogedi pisut malinnaavigeqqullugit attaveqarfigaa, Ole Henriksenilu piniarnermut allagartaqarmat tamatuminnga iminneqarpoq.

Ole Henriksenip nannut pingajoqqat ataasinngornermi nalunaaqutaq 9.30 siumorneqarsimagamik nunaqarfimmut narajorlutik pisimassangatippai.

Video: Kuuka Ottosen

Marloqqat pingajoqqalluunniit eqqissisimatitaagamik piniaqqusaanngillat. Tungaannulli seqqorfigalugit qimaatinneqaqqusaapput.

Ole Henriksenip umiatsiat tallimat allat peqatigalugit nannut pingajoqqat malersorlugit qimaatinniarsarileruttorai KNR-imit sianerfigineqarpoq.

- Nannunik maanga pisoqartarnera akulikilliartorpoq, ukiummi tamaasa takuffiulermata - nannunik pingasunik siorna aasakkut aamma siumugaqarpunga, Ole Hendriksen KNR-imut oqarpoq.

Qeqertarsuatsiaat tungaannukarsimasut

Nannunik nakkutilliisuutitaanini nuannaraa. 

- Piniakkanut soqutiginnittuugama ajornartorsiutigivallaanngilara. Nuannerpoq.

Nannut pingajoqqat Qeqertarsuatsiaat tungaannukarneranni siumorneqarsimasut, taanna nassuiaavoq.

- Nunaqarfipput qallinerusimagaluarunikku navianartorsiortitsisimassagaluarput. Aallaasilisanngitsup meeqqisartulluunniit siumorsimasuugunikkit navianartorsiorsimasinnaagaluarput, taanna oqarpoq.

Nannut pingajoqqat taakkua qimaatinneqareersimammata Aalisarnermut, Piniarnermut Nunalerinermullu Naalakkersuisoqarfiup malersorneqaqqissangatinngilai.