Suliffiup iluani misissuisoqarnerata aqutsisoqarfiup pisortaa ileqqorluttutut pinngitsuutikkaa
Malene Marie Nielsen Peqqissutsimut Pitsaaliuinermullu Aqutsisoqarfiup, peqqinnissaqarfimmut tamarmiusumut aqutsiveqarfiusup, pisortaraa.
Per Damgaard Laugesen inuussutissarsiortuuvoq assigiinngitsunillu illuuteqarluni, taakkulu ilarpassui peqqinnissaqarfimmut attartortittarpai.
Malene Marie Nielsen aamma Per Damgaard Laugesen peqqinnissaqarfimmut sulinermut atatillugu atassuteqarnermik saniatigut aappariiupput.
Tamannalu pissutigalugu aqutsisoqarfiup pisortaata attartortitsiniat allat tunulliullugit uimini salliutittaraa inunnit oqaatiginiarneqartarpoq - allatut oqaatigalugu; peqquserluttuliornerartarpaat.
Tamanna Peqqissutsimut Naalakkersuisoqarfik sinnerlugu suliamik misissuisitsinermi, KNR-ip kissaateqarnermigut pissarsiarisaani, allassimavoq.
Suliffeqarfiup kukkunersiuisut, EY Grønlandip, misissuinermi inernera naalakkersuisoqarfimmut januaarip 27-anni nassiuppaa, kukkunersiuisullu ima inerniliissuteqarput: ”aqutsisoqarfiup pisortaata attuumassuteqarluni akuerisassanik aalajangiisarsimaneranik takussutissarsinngilagut”.
Isumaqatigiissutit millioninik aningaasartallit
Aqutsisoqarfiup suliffeqarfiit uku, aqutsisoqarfiup pisortaata uiata decembarip 3-at, 2019-imi toqqaannartumik piginneqatigiiffigisai niueqatigisarpai.
- Arctic Cleaning Service ApS (25-33 %)
- Deres Auto ApS (50 %)
- Ejendomsselskabet af 1. Juni 2003 ApS (50 %)
- Greenland Facility Services ApS (50 %)
- Grønlands Revisionskontor A/S (100 %)
- MATU Security ApS (50 %)
- Sarfaarsuit (100 %)
Tusarfik: Peqqissutsimut Pitsaaliuinermullu Aqutsisoqarfiup allaffianik immikkut ittumik misissuineq.
Peqqissutsimut Pitsaaliuinermullu Aqutsisoqarfiup suliffeqarfiit qulingiluat niueqatigisarai, taakkunanngalu arfineq-marluk Per Damgaard Laugesenip piginneqatigiiffigigai misissuinerup takutippaa.
Isumaqatigiissutini qammammut 357.900 koruuninik – imaluunniit ukiumut 4,3 millionit koruuninik - naleqartunik attartornissamut isumaqatigiissuteqarnerit ilaatigut ilaapput.
Peqqinnissaqarfiup biilinik, ambulancenik innarluutilinnut bussinik pisiffigisartagaa iluarsartuussitittagaalu Deres Auto, Per Damgaard Laugesenip aamma piginneqatigiiffigaa.
Tamatuma saniatigut Greenland Facility Services nakkutiginninnermik, tillinniartoqarnissaanut kalerrisaarutinik sillimaniarnermullu suliassanik allanik suliarinnittuuvoq. Misissuinermili Deres Auto aamma Greenland Facility Services, Per Damgaard Laugesenip piginneqatigiiffigisai isumaqatigiissutini qanoq iluanaaruteqartiginersut allassimanngilaq.
Pitsanngorsaanerit
Naak nalunaarusiat naapertorlugu aqutsisoqarfiup pisortaata isumaqatigiissutit attuumassuteqarpallaarnini pissutigalugu akuerisimanngikkaluarai, misissuinermi assigiinngitsunik innersuussuteqarpoq.
Aqutsisoqarfiup pisortaata uiata niueqatigineqangaatsiarneratigut aqutsisoqarfimmi sulisut Per Damgaard Laugesenip suliffeqarfiit sorliit akuuffiginerai nakkutigisinnaanngilaat. Aqutsisoqarfiullu ingerlatsinermi pisortaata suliffeqarfiit qanoq amerlatigerpiarneri tupaallaatigaa.
Taamaammat paasissutissat Malene Marie Nielsenimut tunngasut suliffeqarfinnik atassuteqarfigisaanik paasissutissiiffigalugit nutarterneqassasut, EY Grønlandip innersuussutigaa. Tamatuma saniatigut aqutsisoqarfiup pisortaa suliffeqarfimmik piginnittumut, Michael Munchimut Per Damgaard Laugesenip suliffeqarfinni assigiinngitsuni niuernikkut suleqatigisaanut aamma atassuteqarpallaartutut inissinneqassanersoq isumaliutigineqartariaqartoq, EY Grønland allappoq.
Kiisalu aqutsisoqarfiup pisortaa suliffeqarfinnut akuerisanut, atassuteqarfigisaminut aqutsisoqarfiup systemiini isersinnaatinneqanngittariaqarnerarpaa. Taamaaliorneq attrummassuteqarpallaarnerup siunissami ajornartorsiutaannginnissaanut qulakkeerutaassaaq.
Aqutsisoqarfiup pisortaa, Malene Marie Nielsen apersorneqarusunngilaq, misissuinerulli inernera allakkatigut akissuteqarluni iluarisimaarnerarpaa.
