Naalagaaffiit Peqatigiit nunatsinni nunap inoqqaavisa pisinnaatitaaffii misissorniaraat
Nunatsinni nunap inoqqaavisa pisinnaatitaaffii misissorneqassapput.
Naalagaaffiit peqatigiit nunat inoqqaavisa pisinnaatitaaffiinut immikkut ittumik aallartitaata nunarput marsimi (marsip 10-anit 19-ianut) tikeraassavaa, tassanilu nunatsinni pisinnaatitaaffiit misissussallugit.
Victoria Tauli Corpuz Naalagaaffiit Peqatigiinnit 2014-imili immikkut aallartitaalerpoq.
Taanna Filipinerini nunap inoqqaavini Kankana-ey Igorotimi siuttut ilagaat.
Taassuma nunap inoqqaavisa arnallu pisinnaatitaaffii ukiuni 30-nit amerlanerusuni ilungersuutigalugit sulissutigai.
Naalagaaffiit Peqatigiit aallartitaata, Tauli Corpuzip suut nunanit allanit ilinniarfigineqarsinnaanersut paasiniassavai. Tamatuma saniatigut unammillernartut misissorlugillu suut pitsanngorsarneqarsinnaanersut innersuussuteqassalluni.
Naalagaaffiit Peqatigiit aallartitaata tikeraarnissaminut atatillugu nunatsinni pissutsit pillugit paasissutissanik, suut misissuiffigissanerlugit kinalu oqaloqatigisariaqarnerlugu ikioqquvoq.
Silap pissusiata allanngoriartornera, namminersorneq, ineriartorneq, peqqinneq aamma meeqqat inuusuttullu pillugit pissutsit Victoria Tauli Corpuzip immikkut ittumik soqutigisaasa ilagaat.
Naalagaaffiit Peqatigiit aallartitaanut ilisimasannik tunniussaqarusukkuit indigenous@ohchr.org-imut kingusinnerpaamik sapaat februaarip 16-iat nallertinnagu nassiussissaatit.
