Timmisartoq kukkusoqarneratigut nakkartinneqartoq Iranip nassuerutigaa
Inuup kukkuneratigut timmisartoq nakkartinneqartoq illersornissaqarfiup oqaatigaa.
Ukrainemiut timmisartuata kukkunikkut nakkartinneqarsimanera pillugu Iranip qullersaata Ayatollah Ali Khameneip ippassaq tallimanngornermi ilisimatinneqarsimanini nalunaarutigaa, paasissutissallu taakku piaarnerpaamik saqqummiunneqarnissaat kissaatigalugu.
Timmisartoq pineqartoq Iranimi illersornissaqarfiup sakkutooqarfiata silaannartaanut pisimasoq, taamalimmallu nakkartinneqartoq, Iranimi illersornissaqarfiup tv-kkut aallakaatinneqartumi oqaatigaa.
Timmisartumik nakkartitsinermi akisussaasut eqqartuussivitsigut malersorneqarnissaat, illersornissaqarfiup neriorsuutigaa.
- Ajunaartut ilaqutaannut, innuttaasunullu misiginneqataavugut, nunanilu allaneersunut aamma misiginneqataavugut, illersornissaqarfik oqarpoq.
Iranimiut 80-it, Canadamiut 57-it, Sverigemeersut qulit, Afghanistanimeersut, Tysklandimeersut Tuluillu Nunaanneersut timmisartumi issimasut ajunaarput.