Ingerlaqqittussat sivikinnermik utaqqisalissapput
Air Greenlandip maannamut ukiup ataatsip missaani, angalasut SAS-ip timmisartuutaannik Aalborgimut imaluunniit Århusimut ingerlaqqittussat nassataasa ingerlateqqinneqarnissaat neqeroorutigisarpaa.
Siorna isumaqatigiissusiortoqarmat, isumaqatigiissutigineqarpoq timmisartorsuup tikinneraniit, ingerlaqqittussat aallarnissaannut 90 minutsit qaangiunnerisigut tamanna pisassasoq, taamaalilluni nassatanik misissuineq piffissaqarfigineqarniassammat. Maannalu misissuinissamut 45 minutsiinnaat piffissaliunneqartalissapput.
Taamaalilluni angalasut Aalborgimut aamma Århusimut ingerlaqqittussat, nassatatik apuuffimminni aatsaat tigusussanngorlugit, aallalernerminni tunniussinnaavaat, aamma Narsarsuarmiit angalasuugaluarunilluunniit. Soorlu Københavnimut nalunaaqutaq 22.05 apuuttut Aalborgimut Århusimulluunniit 22.55 ingerlaqqittassapput.
