Qimarnguiit paasititsiniaanermi qanimut suleqataarusupput

Meeqqat ilaqutariillu atugarissaarnissaat pillugit innersuussutit qimarnguiit kattuffiannit nuannaarutigineqarput. Tarnikkut timikkullu annersaasarneq pillugu paasisitsiniaasoqalerpat meeqqat salliutinneqassasut, Qimarnguiit peqatigiiffiisa kattuffianni siulittaasoq Regine Enoksen isumaqarpoq.
Skrevet af Oline I. Olsen
27. oktober 2009 14:51

- Meeqqat annersaaviup toqqissisimanngiffiullu iluani peroriartortut tarnikkut persuttagaaneq atulereertarpaat, sullinneqanngikkaangamillu tusaasatik isigisatillu ilikkartarpaat nangittarlugillu, Regine Enoksen oqarpoq.

Tarnikkut timikkullu annersaasarneq pillugu paasisitsiniaasoqalernera kattuffimmit nuannaarutigineqarpoq.

- Sinerissami qimarnguinni sullissisuusugut ukiumut nalunaarusiarisartakkatsinni tarnikkut persuttaasarneq qaffasittorujussuuvoq, Regine Enoksen oqarpoq. Isummersortarnerup sulissutiginissaanut isumaginninnikkullu akisussaassutsimut sulissutissat 1,2 millionit koruuninik immikkoortitsiffigineqartut naalakkersuisoq Maliina Abelsen saqqummiinermini ippassaq oqarpoq.

Paasisitsiniaasoqalerpallu qimarnguinni sullissisut qanimut suleqatigineqarnissaat qimarnguiit peqatigiiffiisa kattuffiannit kissaatigineqarpoq. Tassami persuttaasarneq pillugu paasisitsiniaasoqaleraagat qimarnguinnik atuisut amerlisarmata.

- Paasisitsiniaanermi sullissisussat piareersimatsinneqartaraluarpata, aalajangersimasumik suliaqartussat, piffissallit allarpassuarnillu suliaqanngitsut, taava paasisitsiniaaneq annertunerusumik imminut akilersinnaasassagaluarpoq, Regine Enoksen oqarpoq.

Din mening er vigtig for os. Vi modtager gerne ris eller ros om denne artikel.

Læs også