Kujataa meeqqat illersuisuanit tikeraarneqalersoq
Narsarsuaq, Qassiarsuk, Narsaq, Qaqortoq, Alluitsup Paa, Nanortalik Aappilattorlu Meeqqat Illersuisuanit apriilimit maajip tungaanut tikeraarneqassapput.
Meeqqat inuunerminni atugarisaannik nakkutilliinissaq Meeqqat Illersuisuata MIO-llu ilaatigut siunertaraat.
- Meeqqat inersimasullu meeqqat atugarisaat pillugit isumaannik ilisimasaqarnissartik Meeqqat Illersuisuata MIO-llu kissaatigaat, Meeqqat Illersuisuat tusagassiuutinut nalunaarummi allappoq.
Aamma atuaruk MIO-p periusissatut pilersaarutaa piareertoq
- Taamaammat Meeqqat Illersuisuat meeqqat, inuusuttut inersimasullu kujataani pissutsit pillugit oqaloqatiginninnissamut qaaqqusivoq. Aamma meeqqat atugarisaat pillugit siunnersuisoqassallunilu ilitsersuisoqassaaq, Aviâja Egede Lynge allappoq.
Meeqqat atuarfinni assigiinngitsunik sammisaqartinneqarnissaat MIO-p pilersaarutigaa.
Aamma MIO-p kommuni ataatsimeeqatiginiarpaa, meeqqanullu sullissisunut pikkorissartitsiniarluni.