MIO-p periusissatut pilersaarutaa piareertoq
Nunatsinnilu inatsisiliarineqartartut naalagaaffiit peqatigiit meeqqat pillugit isumaqatigiissutaannut naapertuutsillugit ukiuni marlunni tulliuttuni tassa 2018-ip tungaanut MIO-mit suliarineqartassapput.
Naalagaaffiit peqatigiit meeqqat pisinnaatitaaffii pillugit isumaqatigiissutaat nunatsinni 1992-imi atuuttussanngortinneqarpoq, tamannalu isumaqarpoq isumaqatigiissummi aalajanngiunneqarsimasut malillugit nunatsinni ukiuni 24-ini pisussaaffeqarsimasugut. Taakku pillugit ilaatigut MIO Meeqqallu illersuisuat pilersinneqarnikuupput.
Meeqqat pisinnaatitaaffii pillugit suliniaqatigiiffimmit suliniummi nutaami meeqqat assigiinngisinneqannginnissaat, meeqqallu ilaatinneqartarnissaasa pingaassusaat ilaatigut tunngavigineqassapput.
MIO-lu meeqqat pisinnaatitaaffiisa inatsisaanut killigititaannullu tapersersuisuunissamik suliaqartuuvoq.
Kiisalu inatsisit malillugit pisussaatitaaffimmik suliaqarnermi avataatigut iliuusissatut pilersaarummi ukiuni marlunni aggersuni arfinilinnik allanik alaatsinaaffissaqarpoq.
Assersuutigalu meeqqat eqqortumik ineriartornissaat, tunuliaquttallu apeqqutaatinnagit ilikkagaqarsinnaanissaat ilinniagaqarsinnaanissaallu. Taakkulu saniatigut nunaqarfinni pissutsinut, meeqqallu pisinnaatitaaffimminut aammalu suliniaqatigiiffik MIO pillugu ilisimasaqarnissaat aamma MIOmit nakkutigineqartussaapput.
Meeqqanut siunnersuisoqatigiit nutaat pilersinneqassapput
Meeqqat siunnersuisoqatigiivisa nutaat saqqummernissaannut iliuusissatut pilersaarut nutaaq utaqqisinneqarsimavoq, naammassineqarneralu, meeqqat illersuisuata Aviâja Egede Lyngep nuannaarutigaa.
- Meeqqanut Siunnersuisoqatigiittaavut pitsaasuupput, tunniusimallutik suliaqarnerminnilu nukittuujullutik. Qularinngilara suliniutissatsinnut periusissiatsinni suleqatigiinnissarput pissarsiffiulluarumaartoq nunatsinnilu meeqqat inuusuttullu pisinnaatitaaffiinut iluaqutaalluaarumaarluni”, Meeqqat Illersuisuat Aviâja Egede Lynge oqarpoq.
Meeqqanut siunnersuisoqatigiit maanna ilaasortaaraat Meeqqat Illersuisuat Aviâja Egede Lynge, inatsisileritooq Morten Nornild, isumaginninnermut siunnersorti Sara Abelsen, katsorsaasoq aamma perorsaasoq Anda Poulsen, psykolog Conni Gregersen, meeqqat nakorsaat Inga Hjuler aamma ilinniartitsisoq William Kriegel.
Periusissatut pilersaarut ataani aaneqarsinnaavoq: