Uummannarmiuaqqat Odensemi tusarnaartitsilersut
Meeqqat inuusuttullu Uummannami Meeqqat angerlarsimaffianneersut Nuummiu Pele Møller erneralu Glenn peqatigalugit aqagu Odensemi Kalaallit Illuutaanni tusarnaartitsissapput.
Kalaallit Illuutaat tusagassiorfinnut nalunaaruteqarluni taama allappoq.
Uummannarmiut nipilersortartut qitittartullu kalaallit Tivolimi naapisimaaqatigiinnerannut peqataajartorlutik Danmarkimiipput, periarfissarlu iluatsillugu Odensemi aamma tusarnaartitsillutillu takutitsissapput.
Iserneq akeqanngilaq.
Inuusuttut tamarmik Uummannami Meeqqat angerlarsimaffianneersuupput. Taanna ulloq unnuarlu angerlarsimaffiuvoq meeqqanut inuusuttunullu katsorsaanermik neqerooruteqarfiusoq.
Meeqqat angerlarsimaffianni inuusuttut nuannersunik misigisaqartinnerisigut iluatsitaqarnissaallu anguniagaavoq, taamaaliornikkut imminnut naleqartinnissaat nukittorsarniarlugu.
Meeqqanik sullissinermi sammisassaqartitsinerit assigiinngitsorpassuit atorneqarput, soorlu nipilersorneq, eqqumiitsuliorneq, erinarsorneq timersornerillu. Taakkulu meeqqat ulluinnarni nuannersunik eqqarsaateqalersinnissaannik siunertaqarput.
