Umiarsuit uuliamik kinertumik ikummatissallik killilerniaraat
Suleqatigiiffiup imaani avatangiisit illersorneqarnissaannut ataatsimiititaliaata, MEPC-ip, julip ulluisa arfineq-aappaani ataatsimiinnerani tamanna aalajangerneqarpoq.
Tassalu MEPC-mi ataatsimiititaliap apriilimi 2018-imi ataatsimiittoqaqqinnginnerani uuliamik kinertumik ikummateqarnermut atatillugu navianartup millilerneqarnissaanut misissuillunilu iliuuserineqarsinnaasunik piareersaassaaq.
AAMMA ATUARUK Uuliamik kinertumik nunarsuaq tamakkerlugu inerteqquteqarnissaq RAL-ip isumaqatigaa
Uulia kinertoq umiarsuarni angisuuni ikummatissatut atorneqartarpoq, ikummatissaniillu allanit akikinnerulluni. Uuliarli kinertoq ikummatissanit allanit mingutsitsinerusutut kuuttoortoqartillugu immikkut ajornartorsiutaasartutut avatangiisinut illersuiniaqatigiiffinninngaanniit isornartorsiorneqartarpoq.
Uuliap kinertup navianartortaanut milliliiniarnermut suliaq maanna aallartereersoq nunanit Issittumiittunit nunaniillu Issittup avataaniittunit tapersersorneqarpoq. Aamma Naalakkersuisut siunnersuummut tapersersuereerput.
Siunnersuut nunatsinnit akerlilerneqanngitsoq Naalakkersuisut danskit aallartitaannut ataatsimiinneq sioqqullugu nalunaarsimasut, avatangiisinut naalakkersuisoqarfimmit KNR-imut ilisimatitsissutigineqarpoq.
AAMMA ATUARUK Danskit umiarsuaatillit umiarsuit uuliamik kinertumik Issittumi atuiunnaaqqugaat
Danmarkimi Umiarsuaatillit Peqatigiiffiata, ilaatigut Royal Arctic Linemit ilaasortaaffigineqartup, uuliap kinertup inerteqqutaalernissaanut tapersersuilluni siornatigut ersersereerpaa. Aamma norgemiut ingerlatseqatigiiffiat, Hurtigruten, Norgemilu umiarsuaatillit kattuffiat tapersersuisut, Arctic Deeplymit allaaserineqarpoq.
Ruslandip Issittumi nunataani arlalinni ikummatissat uulia kinertutut ittut pisariaqartinneqarmata, Rusland uuliamut kinertumut killilersuinermut siornatigut akerliugaluarpoq. Ruslandili IMO-p suliniutaanut nutaamut aamma tapersersuivoq.
Internettikkut tusagassiuut Arctic Deeply IMO-meersunik oqaloqateqarsimasoq naapertorlugu, umiarsuit ilusaat, atortorissaarutit nutaat ikummatissanullu ilaannut killilersuinerit ilaatigut misissorneqassapput.
Uuliap kinertup avatangiisinut navianartortaqarnera pissutigalugu Sikuiuitsoq Kujallermi 2011-mi inerteqqutaalerpoq. .
AAMMA ATUARUK Uuliap kinertup inerteqqutigineqarnissaa naalakkersuisooqataasut taperseraat
Uuliap kinertup Svalbardimi ikummatigineqarnissaa Norgemit aamma inerteqqutaalersinneqareerpoq. Issittup sinnerani uuliamik kinertumik atuinnginnissaq maannakkuugallartoq kajumissaarutigineqarpoq
