Danskit umiarsuaatillit umiarsuit uuliamik kinertumik Issittumi atuiunnaaqqugaat

Silap pissusaa eqqarsaatigalugu umiarsuarnut uuliap kinertup Nunarsuarmut tamarmut inerteqqutinngortinnissaa Danskit naalakkersuisui Naalagaaffiit Peqatigiit imaatigut angallanneq pillugu suliniaqatigiiffiannut, IMO-mut kimigiisertariaqartoq, Danmarkimi umiarsuaatileqatigiit peqatigiiffianit oqaatigineqarpoq.

Umiarsuarnut uuliamik kinertumik atuisoqaraangat ikuallassaat avatangiisinut siaruartarpoq, taamaattoqaraangallu paamut sananeqaatit mikinerit pinngortarput sikuiuitsullu sikuanut tukkaangata siku taartunngortittarpaat. Sikulu taarneruleraangat seqinermit kissatsianerusarpoq, sukkanermillu aakkiartorluni, taamaalillunilu imaq qaffakkiartortillugu.

Umiarsuaatileqatigiit peqatigiiffiata siunnersortaani qullersaq Jesper Stubkjær naapertorlugu, IMO-p uuliamik kinertumik atuineq nunarsuarmi tamani inerteqqutinngortitsinissaa pingaaruteqarpoq.

- Taava umiarsuarnut tamanut suminngaanneernerat apeqqutaatinnagu inerteqqutaalissaaq, tamannalu avatangiisinut iluaqutaassaaq. Tamatumalu saniatigut unammilleqatigiinnermi pilluttoortitsisoqarnissaa pinngitsoortinneqassaaq, Jesper Stubkjær oqarpoq.

Marinediesel uuliamut kinertumut taarsiunneqarsinnaavoq. Marinedieselili marloriaammik akisuneruvoq, umiarsuaateqarfiillu uuliamik kinertumik atuinngitsut uuliamik kinertumik atuisunut unammillersinnaanerat killeqarpoq. Taamaammat nunarsuaq tamakkerlugu inerteqqutinngortitsinissaq pingaartoq, Jesper Stubkærip oqaatigaa.

Svalbardimi uuliap kinertup atornissaa Norgemit inerteqqutinngortinneqareerpoq. Aamma Qalasersuaq Kujallermi umiarsuit uuliamik kinertumik atuinissaat inerteqqutaavoq.

Avatangiisinut ministeri Esben Lunde Larsen Danmarkimi umiarsuaatileqatigiit peqatigiiffiata kaammattuutaanut  oqaaseqarusunngilaq.